Central Seminary Board: Benefits And Concerns مرکزی مدرسہ بورڈفوائد وخدشات

محمود عالم صدیقی

اعلیٰ سطحی سچر کمیٹی رپورٹ جس میں مسلمانوں کی تعلیمی، سماجی، سیاسی اور اقتصادی حالت پسماندہ (OBC)ہندو سے نہایت خراب اور ایس سی۔ایس ٹی (SC,ST) سے کچھ بہتر دکھائی گئی ہے،کے بعد یوپی اے حکومت نےمسلمانوں میں تعلیمی بہتری لانے کے لیے مرکزی مدرسہ بورڈ کی تشکیل کا اعلان کیا اور اس کی ذمہ داری قومی کمیشن برائے اقلیتی تعلیمی ادارہ جات کے چیئرمین جناب سہیل اعجاز صدیقی صاحب کے سپرد کی ، جنہوں نےاس سلسلے میں بڑی محنت اور تگ ودو سے کام لیتے ہوئے کئی سیمینار اور میٹنگوں کا اہتمام کیا۔ ان میں 3دسمبر 2006کی میٹنگ قابل ذکر ہے ۔ اس میٹنگ میں انہوں نے ہندوستان کے اکثر وبیشتر مدارس کے مہتمم ومنتظم حضرات کو مدعو کیا تاکہ وہ مرکزی مدرسہ بورڈ سے متعلق اپنی آرا وخیالات کا اظہار کریں۔ پھر انہوں نے 21اپریل 2007کو مرکزی مدرسہ بورڈ کے قیام سے متعلق سفارشات پر مبنی رپورٹ وزیر برائے فروغ انسانی وسائل جناب راجن سنگھ کے سامنے پیش کردی ۔اس رپورٹ میں یہ ،دکھایا گیا تھا کہ مرکزی مدرسہ بورڈ کی حمایت اکثر مکتبہ فکر کے علما نے کی ہے۔ مگر 23اپریل 2008کو مہتمم دارالعلوم ندوۃ العلما اور مسلم پرسنل لابورڈ کے صدر جناب رابع حسنی ندوی نے مرکزی مدرسہ بورڈ کی مخالفت کھل کر کرنی شروع کردی۔اس سے قبل مسلم پرسنل لا نے اپنے 26نومبر 2006کے خط میں قومی کمیشن برائے اقلیتی تعلیمی ادارہ جات کو اپنے مرکزی مدرسہ مخالف موقف سے مطلع بھی کیا تھا۔

ان مخالفتوں کے باوجود سہیل اعجاز صدیقی صاحب نے ہمت نہیں ہاری اور مرکزی مدرسہ بورڈ کی تشکیل کے لیے ہر لمحہ کو شاں رہے۔ اس سلسلہ میں ان کی تائید بہت سے اہل علم نے بھی کی ۔جنہوں نے اپنی قلمی نگار شات کے ذریعے مرکزی مدرسہ بورڈ کی نہ صرف تائید کی بلکہ مرکزی مدرسہ بورڈ کیا ہے؟ سے متعلق عوام الناس کو مطلع بھی کیا ۔جن میں احقر بھی شامل ہے۔ موصوف نے مرکزی مدرسہ بورڈ سے متعلق کئی مضامین ،‘‘مرکزی مدرسہ بورڈ کی تشکیل’’ ،‘‘مسلم پرسنل لا اور مرکزی مدرسہ بورڈ’’، ‘‘مدارس اسلامیہ پر اجارہ داری’’ اور ‘‘مرکزی مدرسہ بورڈ: فوائد وخدشات ’’عرق ریزکاوش کے بعد لکھے ۔جنہیں قومی آواز ،روزنامہ راشٹریہ سہارا اور دیگر اخبارت نے شائع کیا اور قومی کمیشن برائے اقلیتی تعلیمی ادارہ جات نے انگریزی میں ترجمہ کر کے وزارت برائے فروغ انسانی وسائل (MHRD)میں بھیجے ۔ان مضامین اور ان جیسے دیگر مضامین کی وجہ سے قومی کمیشن برائے اقلیتی تعلیمی ادارہ جات کے چیئر مین جناب سہیل اعجاز صدیقی کی محنت رنگ لائی تاکہ سابق وزیر برائے فروغ انسانی وسائل جناب ارجن سنگھ نے فروری 2009کے ایک بیان میں یہ کہا کہ یوپی اے حکومت بہت جلد مرکزی مدرسہ بورڈ کا بل پارلیامنٹ میں پیش کرے گی۔ مزید انہوں نے یہ بھی کہا کہ وزارت فروغ انسانی وسائل مدرسہ بورڈ کی تشکیل کے بعد بورڈ سے ملحق مدارس کو اسناد کو CBSEکے مساوی قرار دینے کے بارے میں بھی غور وخوض کررہی ہے ۔تاہم اپریل ۔مئی 2009کےپارلیمانی انتخابات کے پیش نظر مرکزی مدرسہ بورڈ کے پروگرام کو ملتوی کردیا گیا۔ انتخابات کے بعد جب یوپی اے حکومت برسراقتدار ہوئی تو نئے وزیر برائے فروغ انسانی وسائل جناب کپل سبل صاحب نے یوپی اے حکومت کے سودن کے ایکشن پلان کے تحت تعلیمی ایکٹ Right to education کے ساتھ مرکزی بورڈ کے پروگرام کو بھی شامل کیا اور جب وزارت فروغ انسانی وسائل تعلیمی ایکٹ کے پروگرام سے فارغ ہوئی تو وزیر برائے فروغ انسانی وسائل نے 3اکتوبر 2009کو مسلم ممبر اِن پارلیامنٹ کی ایک میٹنگ بلائی جس میں دونوں ایوانوں کے اٹھارہ مسلم ممبران نے شرکت کی۔ ان میں سے اکثر نے مرکزی مدرسہ بورڈ کی تشکیل کی مواقفت کی تاہم ان میں سے بعض نے مدرسہ بورڈ کے موجودہ بل میں ترمیم و اضافہ کرنے کی بات کہی ۔جب کہ بعض نے مرکزی مدرسہ بورڈ کی تشکیل کی مکمل مخالفت کی جن میں آسام کے ممبر پارلیامنٹ جناب بدرالدین اجمل صاحب اور حیدر آباد کے جناب اسد الدین اویسی شامل ہیں۔ اس میٹنگ کے بعدکپل سبل صاحب نے میڈیا کو بتایا کہ حکومت کا مدارس میں کسی طرح کی دخل اندازی کا کوئی ارادہ نہیں ہے اور ناہی ہم مرکزی مدرسہ بورڈ کے سلسلے میں جلد بازی سے کام لے گی ۔ ہم بورڈ کی تشکیل اسی وقت کریں گے جب مسلم کمیونٹی متفقہ طور پر راضی ہوگی۔نیز جن مسلم ممبران پارلیامنٹ نے بورڈ کے بل میں ترمیم کی بات کہی ان سے ایک ماہ کے اندر اپنی سفارشات وزارت فروغ انسانی وسائل کو بھیجنے کو کہا۔ یوپی اے حکومت کی مدارس کے تئیں یہ اصلاح کو ششیں اور ان مدارس کو مین اسٹریم سے جوڑ نے کی جدوجہد ایک قابل ستائش عمل ہے اور ان پر چار فیصد طلبا کے لیے حوصلہ افزائی اور خوش آئند بات ہے جو مدارس میں زیر تعلیم ہیں ۔

میرے خیال میں مرکزی مدرسہ بورڈ کی مخالفت ایک بے جاعمل ہے کیونکہ یہ مخالفت قوم وملت کےحق میں نہیں ہے ۔آج حکومت مہربان ہے اور وہ سچر کمیٹی کی سفارش پر عمل کرتے ہوئے مرکزی مدرسہ بورڈ کی تشکیل کرنا چاہتی ہے تو ہماری بدقسمتی یہ ہے کہ ہم مسلمان اور ہمارے علما ودانشور خود اس کی مخالفت کررہے ہیں ۔جب کہ حقیقت یہ ہے کہ مرکزی مدرسہ بورڈ کی تشکیل قوم وملت کی فلاح وبہبود کے لیے ناگریز ہے۔ اس کے ذریعہ ہمارے مدارس کےطلبا جہاں ایک طرف اسلامی اور موڈرن علوم سے سرفراز ہوسکتے ہیں تو وہیں وہ حکومت کے اعلیٰ عہدوں تک رسائی کرسکتے ہیں، یہی سرسید احمد خان کا بھی مقصد تھا۔ اسی مقصد کےتحت انہوں نے محمڈن اینگلو اور نیٹل کالج کی بنیاد 1875میں ڈالی تھی جو آج علی گڑھ مسلم یونیورسٹی کی شکل اختیار کرچکا ہے جس کی اس وقت کے بعض علمانے پر زور مخالفت کی تھی جب کہ آج ہم سب علی گڑھ مسلم یونیورسٹی کی اہمیت وافادیت سے اچھی طرح واقف ہیں۔

یہ بھی ایک مسلم حقیقت ہے کہ آج مدارس اسلامیہ میں جو نصاب تعلیم رائج ہے وہ مغلیہ دور کے عالم ملا نظام الدین نے اس وقت کے تقاضے کے لحاظ سے تیار کیا تھا ، جو آج اس سائنسی وتکنیکی دور کی ضروریات کو پورا کرنے سے قاصر ہے۔ مصرسے لیکر سعودیہ عربیہ تک تمام عرب واسلامی وخلیجی ممالک نے اپنے مدارس کے نصاب تعلیم میں وقت وحالات کے مد نظر ترمیم و اضافے کیے اور یہ مدارس حکومت کے تعلیمی پروگرام کے تحت زیر عمل ہیں ۔مگر نہ  جانے کیوں ہمارے ہندوستانی علما مدرسے کی تعلیم کو مین اسٹریم سے جوڑ نے کی مخالفت کررہے ہیں ۔جو چار فیصد طلبا مدارس میں زیر تعلیم تکمل ہونے کے بعد یہ طلبا روزی روٹی کے لیے سرگرداں پھرتے ہیں۔

جہاں تک ان اندیشوں کا سوال ہے جن کی وجہ سے مرکزی مدرسہ بورڈ کی مخالفت کی جارہی ہے ،ان میں سے ایک یہ ہے کہ مرکزی مدرسہ بورڈ کے ذریعے حکومت مدارس کے امور میں دخل اندازی کرنا چاہتی ہے اور اس طرح مدارس کی انفرادیت وسالمیت پر حملہ کرنا چاہتی ہے۔ جس سے مدارس کے وجود کو خطرہ لاحق ہوسکتا ہے ۔ اس اندیشے پر بات کرنے سے پہلے مناسب معلوم ہوتا ہےکہ مرکزی مدرسہ بورڈ کا تعارف اور مقاصد بالتفصیل بیان کردیے جائیں تاکہ اس اندیشے کا ازالہ خود بخود ہوجائے۔

طرح ایک خود مختار ادارہ (body autonomous) ہوگا ۔جس کا مقصد ہندوستان کے کونے کونے میں تسبیح کے ٹوٹے ہوئے دانوں کی طرح بکھر ے ہزاروں مدارس اسلامیہ کو ایک نظام کے تحت مربوط کرنا ہے اور ان کے درمیان مکمل تعاون اور تال میل پیدا کرنا ہے۔ اسکے علاوہ مرکزی مدرسہ کا بنیادی مقصد مدارس اسلامیہ کو عصری علوم سے جوڑ کر ان کی اسناد کو سرکاری منظوری دلانا ہے تاکہ ان مدارس کے فارغین جو فراغت کے بعد معاشی پریشانیوں کے سبب سرگرداں پھرتے ہیں ان کو ان پریشانیوں سے نجات دلایا جاسکے اور انہیں سرکاری وغیر سرکاری نوکریوں میں کام کرنے کے مواقع فراہم کیے جاسکیں تاکہ وہ اپنی اور اپنے خاندان اور قوم وملت کی اقتصادی اعتبار سے خدمت کرسکیں۔

اس مرکزی مدرسہ بورڈ کی سب سے بڑی خوبی یہ ہے کہ اس سے الحاق اجباری نہیں بلکہ اختیاری ہوگا اور جو مدارس اس بورڈ سے الحاق کریں گے ان کے اساتذہ کو اس الحاق کے بدلے سرکار اتنی ہی تنخواہ فراہم کرے گی جتنی اسکول کے سرکاری ٹیچر کوملتی ہے ۔ اس کے علاوہ مرکزی مدرسہ بورڈ سے ملحق مدارس کو ہر سال ان کی تعمیر وترقی کے لیے ایک بڑی رقم عطا کرے گی۔ ان رقوم اور اساتذہ کی تنخواہ دینے کا مقصد یہ بالکل نہیں ہے کہ یہ بورڈمدارس اسلامیہ کے اندرونی معاملات میں دخل اندازی کریں گے۔ جیسا کہ مسلم پرسنل لا بورڈ اور دیگر حضرات کا خیال ہے بلکہ مرکزی مدرسہ بورڈ مدارس کے نصاب میں تبدیلی صرف انہی مضامین میں کرے گا جو عصری علوم پر مشتمل ہوں گے تاکہ ان مضامین میں جو دینی علوم پر مشتمل ہیں۔ یہ تبدیلی بھی مرکزی مدرسہ بورڈ کے ممبران مسلمانوں کے اپنے نمائندے ہوں گے ۔جیسا کہ مرکزی مدرسہ بورڈ ایکٹ 2009کےمسودہ سے واضح ہوتا ہے:‘‘(1) ایسے اقدامات کرنا بورڈ کا عام فرض منصبی ہوگا جوکہ اس کے خیال میں مدرسہ نظام کی معیار بندی اور اس کے جامع ،منظم اورمربوط ترقی وتعلیم کے ذریعہ بین مذاہب مفاہمت کے فروغ کے لیے مناسب ہوں گے ۔ اس ایکٹ کے تحت اپنے کاموں کی انجام دہی کے لیے بورڈ :(a)مدرسہ تعلیم کے دینیاتی عنصر میں کسی طرح کی دخل اندازی کئے بغیر ،نیز اسلام کی آزادنہ ،آفاقی وعملی نظامت پر زور دیتے ہوئے مدرسہ نظام تعلیم کی مرکزی اسلامی بصیرت کی نگرانی کرسکتا ہے اور اسے فروغ دے سکتا ہے’’۔(مرکزی مدرسہ بورڈ بل 2009،ص 14) مزید یہ کہ مرکزی مدرسہ بورڈ مدارس اسلامیہ کے مالی امور میں دخل اندازی نہیں کرے گا بلکہ ان ہی رقوم کے حساب وکتاب کے بارے میں باز پرسں کرے گا جو حکومت انہیں عصری علوم کے فروغ کے لیے عطا کرے گی۔ مزید برآں اگر کوئی مدرسہ اس بورڈ سے کسی طرح کا خطرہ محسوس کرے تو وہ جب چاہے اپنا الحاق ختم کراسکتا ہے ۔ الحاق ختم کرانے کی کئی صورتیں ہوسکتی ہیں ۔ ان میں سے ایک یہ کہ آپ نیشنل کمیشن فار مائنارٹی ایجوکیشنل انسٹی ٹیوشن کے نام درخواست لکھ کر الحاق ختم کراکر مالی امداد لینا بند کرسکتے ہیں۔

دوسری بات جو مرکزی مدرسہ بورڈ کی مخالفت کرتے وقت کہی جاتی ہے وہ یہ ہے کہ حکومت صرف ان چار فیصد طلبا کے لئے کیوں پریشان ہے جو مدارس میں زیر تعلیم ہیں ان کے علاوہ بقیہ چھیانوے فیصد مسلم بچوں کی تعلیم کے لیے کوئی خاکہ کیوں نہیں تیار کرتی؟ دراصل یہ ایک ایسی اعتراض ہے جو عدم علم کی بنیاد پر کیا جارہا ہے ۔سچر کمیٹی رپورٹ کے مطابق سرکاری اسکولوں میں 30فیصد اور مدارس میں چار فیصد ہیں۔ کل ملا کر یہ تعداد سوفیصد ہوتی ہے۔ظاہر ہے سرکاری اسکول اور پرائیوٹ اسکول کی تعلیم مین اسٹریم  سے جڑی ہوئی ہے اور اب رہ جاتی ہے صرف مدرسے کی تعلیم جو مین اسٹریم کے جڑی ہوئی نہیں ہے۔ یہی وجہ ہے کہ سچر کمیٹی ،جس نے مدرسے میں زیر تعلیم طلبا کی تعداد چار بتائی تھی ،نے مدرسہ کی تعلیم کو مین اسٹریم سے جوڑ نے کی سفارشات کی ہیں جو مندرجہ ذیل ہیں :

‘‘(1) مدارس کو ایک ہائر سکنڈری اسکول بورڈ سے وابستہ کرنے کا نظام وضع کرنا چاہئے تاکہ ان کے ایسے طلبا جو با ضابطہ بنیادی تعلیم کے دھارے میں جانا چاہے تو وہ مدرسہ تعلیم ختم کرنے کے بعد ایسا کرسکیں۔(2) مدارس کی اسناد کو اعلیٰ تعلیم کے اداروں میں داخلے کے لیے بھی یکساں قدروقیمت فراہم کی جانی چاہئے کہ مدارس کے فارغین چاہیں تو باضابطہ بنیادی تعلیم کے دھارے سے بھی استفادہ کرسکیں۔ باالفاظ دیگر انہیں بطور خاص ان کو رسوں میں مواقع فراہم کیے جانے چاہئے جہاں داخلے کےٹیسٹ مقابلہ جاتی امتحانات کے ذریعہ ہوتے ہوں۔(3)مدارس کی اسناد کو سول سروسز بنکو ں ، ڈیفنس سروسز اور دیگر مقابلہ جاتی امتحانات میں شرکت کے لیے اہلیت کی بنیاد تسلیم کیا جائے ۔ اس میں بنیادی تصور یہ ہے کہ ایک ایسا عمل شروع کیا جائے جس کے تحت مدارس کے فارغین پر بھی روزگار کے ان مواقع کی راہیں کھل سکیں اور انہیں ان میں شریک ہونے کی تحریک حاصل ہوسکے۔ تاہم یہ طریقہ کار مقابلہ جاتی امتحانات کے موجودہ نظام کے دائرے میں ہی ہونا چاہئے ’’۔(ص244،سچر کمیٹی اردو رپورٹ) سچر کمیٹی کی ان سفارشات پر عمل کرتے ہوئے یوپی اے حکومت نےمرکزی مدرسہ بورڈ کی تشکیل کا نہ صرف خاکہ تیار کیا بلکہ ان سفارشات کو مرکزی مدرسہ بورڈ کی شکل میں عملی جامہ بھی پہنانا چاہتی ہے ،مگر اس کی مخالفت آج مسلمان ہی کررہے ہیں۔

دوسری اہم بات یہ ہے کہ ان چار فیصد طلبا میں مکتب جانے والے طلبا کو شامل نہیں کیا گیا ہے۔جہاں تک ان چار فیصد مسلم طلبا کا سوال ہے تو یہ طلبا اپنی تعلیم مکمل کرنے کے بعد علما کہلاتے ہیں اور مسلم سماج میں ان کا مسلمانوں کے مابین بیداری اور عدم بیداری پیدا کرنے میں اہم رول ہوتا ہے لیکن جب یہ خود ہی عصری علوم سے بے بہرہ ہوں گئے تو وہ قوم وملت کی قیادت کیسے کریں گے ۔بلکہ عین ممکن ہے کہ یہ علما مسلمانوں کو عصری علوم سے دور رہنے کا مشورہ دیں جیسا کہ آج علما مرکزی مدرسہ بورڈ کی مخالفت پر کمر بستہ ہیں۔ اس سے پہلے انہوں نے سرسید تحریک کی بھی مخالفت کی تھی ۔لہٰذا ان چار فیصد طلبا کو مین اسٹریم سے جوڑ نے کی اشد ضرورت ہے۔

تیسری اندیشہ جو مرکزی مدرسہ بورڈ سے متعلق ہے وہ یہ ہے کہ اس بورڈ کی حالت کہیں ویسی ہی نہ ہوجائے جیسی ریاستی مدرسہ بورڈ کے تحت چلنے والے مدارس کی ہوئی ہے؟ یہ ایک ایسا اندیشہ ہے جو بجاہے ۔مگر اس اندیشہ کا سدِبات کیاجاسکتا ہے اگر ہماری مسلم قیادت با لخصوص علما اور مسلم پرسنل لا بورڈ، دور اندیشی سے کام لیں۔ جیسا کہ ہم سبھی جانتے ہیں کہ چند دنوں میں مرکزی مدرسہ بورڈ کی تاسیس عمل میں آجائے گی جو ایک ایکٹ کے تحت کام کرے گا۔ اس لیے مسلم قیادت کے لیے ضروری ہے کہ وہ مرکزی مدرسہ بورڈ کے ایکٹ کا بغور مطالعہ کریں اور دیکھیں کہ اس ایکٹ میں ایسے کلاز Cluase نہ ہوں جو مدارس اور مرکز ی مدرسہ بورڈ کے مفاد کے خلاف ہوں۔ یہ مرکزی مدرسہ بورڈ ایکٹ بہت جلد پاس ہونے والا ہے اس لئے مسلم قیادت کو چاہئے کہ وہ مرکزی مدرسہ بورڈ کے ایکٹ کا بغور مطالعہ کریں پھر اگر انہیں کسی بھی کلاز میں کسی طرح کا اندیشہ لاحق ہوتو اسے فوری طور پر دور کرائیں اور مرکزی مدرسہ بورڈ کا استقبال کریں۔

جہاں تک سوال ہے یوپی، بہار بورڈ کے تحت آنے والےمدارس اور ان کی روحانیت کےختم ہونے کاتو اس کی ذمہ داری صرف حکومت نہیں ہے بلکہ یوپی و بہار اوردیگر ریاستوں کے مدرسہ بورڈ کے مہتمم ،منتظمین اور مدرسین حضرات بھی ہیں ۔ یہ حضرات وقت مقررہ پر مدرسہ نہیں آتے ، امتحان میں اپنے عزیزوں کو زیادہ نمبرات دے کر کامیاب کردیتے ہیں تاکہ ان کی مسند درس برقرار رہ سکے اور انہیں بآسانی یہ وراثت ملتی چلی جائے، امتحان میں نقل کراتےہیں جس سے طلبا کی علمی وذہنی نمورک جاتی ہے۔ یہ حضرات وقتی مفاد کی خاطر ایمان داری سے کام نہ لیتے ہوئے مدرسے کی روح کو فنا کرنے میں لگے ہوئے ہیں۔ ان ساری کمیوں کو دورکرنے کے لیے مرکزی مدرسہ بورڈ کی تشکیل کی جارہی ہے جو چیک اور بیلنس کمیٹ کے تحت بھی کام کرے گی۔

لہٰذا میری مسلم قیادت بالخصوص علما سے درخواست ہے کہ مرکزی مدرسہ بورڈ ایکٹ کا ضرو ر مطالعہ کریں اور اس سے منہ پھلا کرنہ رہیں کیونکہ یہ آپ کا اپنا ادارہ ہے ،اس میں پڑھنے والےبچے آپ کےاپنے ہونگے ۔کیا آپ کو یہ گوارہ ہوگا کہ بعض لوگ اپنے مفاد کے لیے آپ کے مستقبل سے کھیلا جائیں ۔مرکزی مدرسہ بورڈ اسی وقت فائدہ مندہوسکتا ہے جب آپ اپنی شرائط کے ساتھ اسے قبول کریں گے۔ جو شرائط اس مرکزی مدرسہ بورڈ کے مستقبل کی ضامن ہوںگی۔ اس کے علاوہ چند وہ شرائط بھی ہیں جو احقر نے مرکزی مدرسہ بورڈ سے متعلق کئی بار اپنے مضامین میں ذکر کی ہیں جو مندرجہ ذیل ہیں :

(1)بورڈ مسلم پرسنل لا کی طرح ایک (autonomousbody) یعنی آزاد مستقل ادارہ ہو (2) مدارس اس مرکزی مدرسہ بورڈ سے نیم الحاق ہوں (3) بورڈ کے ممبران مسلمانوں کے اپنے نمائندے ہوں اور جو بورڈ کے سرکاری عہدیدار نہ ہوں(4) گورنمنٹ مدارس کے دینی مضامین میں کسی طرح کی مداخلت نہ کرے۔(5) حکومت اگر نصاب تعلیم میں تبدیلی کی خواہاں ہے تو صرف مذکورہ مضامین انگلش ،تاریخ اور سیاسیات اور حساب میں اس کی بات مانی جائے گی۔ کیونکہ طلبا کو مین اسٹریم سے جوڑ نے کے لیے یہ چار مضامین کافی ہیں۔

(6) اس نصاب میں حذب واضافہ اکثریت ممبران کی اتفاق رائے سے ہوگا۔

(7) الحاق کی صورت میں مدارس کے فارغین کے لیے اسکول وکالج میں داخلے اورف سرکاری ملازمت کے حصول کے لیے دروازے کھول دیے جائیں اور ان کے ساتھ کسی بھی قسم کا امتیازی سلوک نہ برتا جائے۔

(8) اس بورڈ کا سب سے بڑا کام یہ ہوکہ وہ جو نصاب تشکیل دے اسے تمام مدارس پر نافذ کرے اور ان مدارس کے فارغین کی ڈگریوں کو سرکاری منظوری دلائے

(9)مدارس کے اساتذہ کو معقول تنخواہ سرکاری خزانہ سے دی جائے نیز ان مدارس کی بہتری کے لیے سرکار سالانہ مقررہ رقم کی ادائیگی کا اعلان بھی کرے۔

(10) مرکزی بورڈ غریب طلبہ کو مالی امداد فراہم کرے اور ہونہار طلبا کوان کی حوصلہ افزائی کے لیے مختلف ایوارڈ دے جیسے شاہ ولی اللہ ایوارڈ ،ابن بطوطہ ایوارڈ ، شبلی ایوارڈ وغیرہ تاکہ طلبا میں مقابلے کا شوق اور جذبہ پیدا ہو۔

اگر ان شرائط کے ساتھ مرکزی مدرسہ بورڈ کی تاسیس ہوئی تو مجھے پوری امید ہے کہ یہ بورڈ مسلمانوں میں تعلیمی بیداری لانے میں معاون ہوگا اور اس سے مدارس کو کسی قسم کا خطرہ لاحق نہ ہوگا اور ناہی مدارس کی روحانیت پر کوئی آنچ آئے گی۔جیسا کہ مسلم پرسنل لا بورڈ اپنی سالمیت برقرار رکھتے ہوئےحکومت سے ملحق ہے اور اس کے فیصلوں کو حکومت تسلیم کرتی ہے۔ اس کے علاوہ ہندستان میں بہت سے ادارے ہیں جیسے ITI,IIT,DPS,NTT,INSTITUTES وغیرہ جو نیم سرکاری  ہیں ۔ ان اداروں کی اپنی طے شدہ پالیسیاں ہیں جنہیں ہرحال میں حکومت کو ماننا پڑتا ہے ۔ اپنے وصول وضوابطہ پر قائم رہتے ہوئے یہ ادارے سرکار سے وابستہ اختیار کرسکتے ہیں خود کو مین اسٹریم سے جوڑ کر ان کے طلبا صرف معلم یا امام ہی نہیں بلکہ صدر ،وزیر اعظم، گورنر ، لیکچرر ، ڈائریکٹر اور مجسٹریٹ کے عہدے کو بھی بآسانی حاصل کرسکتے ہیں۔

URL for this article: