Legacy of Muhaddith-e-Deccan Hazrat Abdullah Shah Naqshbandi محدث دکن حضرت عبداللہ شاہ نقشبندی رحمۃ اللہ علیہ کا علمی و دینی ورثہ

 

ساحل رضوی، نیو ایج اسلام

26 اکتوبر 2024

محدث دکن حضرت مولانا سید عبداللہ شاہ نقشبندی حیدرآباد سے تعلق رکھنے والے 20ویں صدی کے عظیم علمائے اسلام میں سے تھے، جو نہ صرف حدیث اور فقہ میں اپنے بے مثال کارناموں کے لیے بلکہ اپنی روحانی و اصلاحی خدمات کے لیے بھی، بطور ایک صوفی مشہور تھے۔ ان کی عظیم الشان تصنیف، "زجاجت المصابیح"، حدیث کے میدان میں ان کی علمی گیرائی و گہرائی کا منہ بولتا ثبوت ہے۔

اہم نکات:

حضرت عبداللہ شاہ کی ولادت 1872 میں حیدرآباد میں ہوئی۔ وہ ایک عظیم عالم دین اور بلند پایہ صوفی بزرگ تھے، جنہیں علم حدیث میں مہارت تامہ حاصل تھی، جس کی وجہ سے انہیں "محدثِ دکن" کہا گیا۔

انہوں نے مشہور کتاب "زجاجت المصابیح" تصنیف کی، جو فقہ حنفی کے باب میں ایک عظیم کارنامہ ہے۔

حضرت عبداللہ شاہ سلسلہ قادریہ کے ساتھ ساتھ سلسلہ نقشبندیہ سے بھی منسلک تھے۔

ان کی روحانی اور علمی و فکری میراث ان کے خاندان اور شاگردوں کے ذریعے اب تک جاری و ساری ہے۔

------------

Auliyaالله - Muhaddis-e-Deccan Hazrat Syed Abdullah Shah Naqshbandi Quadri

-------

مولانا ابوالحسنات سید عبداللہ شاہ المعروف بہ محدث دکن، 10 ذی الحج 1292ھ (6 فروری 1872) کو حسینی عالم، حیدرآباد میں پیدا ہوئے۔ مولانا سید مظفر حسین ان کے والد تھے، جن کا آبائی گھر نلدرگ میں تھا۔ چونکہ ان کے جد اعلیٰ حضرت سید علی ہجرت کر کے آئے تھے، اس لیے بیجاپور کے حکمران عادل شاہ اول نے انہیں زمین عطا کی تھی۔ مولانا کی والدہ حضرت گل بادشاہ کی بیٹی تھیں۔

اپنے زمانے کے لحاظ سے، مولانا عبداللہ شاہ نے باقاعدہ تعلیم حاصل نہیں کی۔ ان کی تعلیم انفرادی طور پر علمائے کرام نے کی۔ ان کے والد نے انہیں فارسی پڑھائی، اور منطق و فلسفہ کی تعلیم انہوں نے مولانا منصور علی خان سے لی۔ اسلامی علوم کے حوالے سے، انہوں نے جامعہ نظامیہ کے بانی مولانا انوار اللہ خان سے قرآنی علوم اور دیگر دینی علوم کی بھی تعلیم حاصل کی۔ مولانا حبیب الرحمن سہارنپوری کے زیر سایہ، انہوں نے فقہ اور علم حدیث کی تعلیم لی، اور زبان و ادب کا علم مولانا حکیم عبد الرحمن سہارنپوری سے لیا۔

تدریسی زندگی

اپنے زمانہ طالب علمی میں ہی، حضرت عبداللہ شاہ نے درس و تدریس کا آغاز کر دیا تھا، جس میں اشرافیہ اور عام لوگ شامل ہوا کرتے تھے۔ ایک معلم کے طور پر ان کی زندگی کا آغاز علی آقا مسجد حسینی عالم، حیدرآباد سے ہوا، اور یہ سلسلہ آخری سانس تک جاری رہا۔ انہوں نے شامی عالم شیخ عبدالفتاح سمیت بہت سے لوگوں کو اجازت فی الحدیث عطا کی۔

روحانی سفر اور تصوف

مولانا عبداللہ شاہ ابتدائی طور پر حیدرآباد کے ایک عظیم صوفی شخصیت حضرت مسکین شاہ رحمۃ اللہ علیہ کے حلقہ ارادت میں شامل ہوئے۔ حضرت مسکین شاہ کی وفات کے بعد، مولانا عبداللہ شاہ حضرت سید محمد بادشاہ بخاریؒ کے حلقہ ارادت میں آ گئے، جو ایک قادری نقشبندی صوفی تھے۔ اس کے بعد مولانا عبداللہ شاہ تقریباً 20 سال تک روزانہ 4 میل پیدل چل کر اپنے مرشد سے ملنے جاتے رہے۔ وہ رات کو تہجد کے وقت ان سے ملنے جایا کرتے تھے۔

مولانا عبداللہ شاہ اپنے روحانی مرشد کی تعلیمات کے سخت پیروکار تھے، اور انہوں نے اپنی پوری زندگی دو سلاسل طریقت، قادریہ اور نقشبندیہ کے لیے وقف کردی۔ انہوں نے سینکڑوں لوگوں کو ان دونوں سلسلوں میں داخل کیا، اور آپ کا روحانی اثر دور دور تک پھیلا۔ ان کے مریدین و متوسلین اکثر زبردست روحانی تجربات کا مشاہدہ کرتے ہیں، بعض اوقات وہ یہ بھی محسوس کرتے ہیں کہ ان کے دل اپنے شیخ کی موجودگی میں خدا کے ذکر کی طرف متوجہ ہو رہے ہیں۔

مولانا عبداللہ شاہ، حماد اسامہ، مشہور صوفی بزرگ حضرت پیر حمید الدین جعفری قادری کے صاحبزادے تھے، جو خود معروف بزرگ حضرت پیر کامل الدین دہلوی کے پوتے ہیں۔

مولانا عبداللہ شاہ نے اپنے روزمرہ کے معمولات پر سخت پابندی کے ساتھ، پوری نظم و ضبط کی زندگی گزاری، جس کی بدولت وہ روزانہ کے 21 گھنٹے عبادت، درس و تدریس اور خدمت خلق میں صرف کیا کرتے تھے۔ آپ کا دن فجر کی نماز سے شروع ہوتا، اور اس کے بعد روحانی تعلیم و تربیت کے بڑے بڑے اجلاس ہوا کرتے تھے۔ آپ صبح میں خواتین کی روحانی تربیت کرتے اور ان کے سوالات کے جواب دیتے، اور دوپہر کا وقت اپنے شاگردوں کی رشد و ہدایت میں صرف کرتے۔ ان کی زندگی مصروف ترین تھی، پھر بھی وہ اپنے مریدین و متوسلین کے قریب تھے، اور خود ان کے خطوط کا جواب دیتے، اور انہیں مفید مشوروں سے نوازتے۔

اپنی عظیم ترین روحانی خدمات کے علاوہ، حضرت عبداللہ شاہ نے حدیث اور فقہ کے میدان میں قابل ذکر علمی خدمات انجام دیں۔ ان کی انتہائی مشہور تصنیف "زوجاجت المصابیح" ہے، جو فقہ حنفی کے حوالے سے پانچ جلدوں پر مشتمل ایک حدیث کی کتاب ہے۔ ان کی دوسری کتابیں: "فضائل نماز"، "یوسف نامہ"، "قیامت نامہ"، "معراج نامہ"، "میلاد نامہ"، "گلزار اولیاء"، "مواعظ حسنہ"، "سلوک مجددیہ"، "فضائل رمضان"، "کتاب المحبت"، "علاج السالکین" ہیں۔

کرامات اور پیشین گوئیاں

عمومی طور پر مولانا عبداللہ شاہ کے مریدین و متوسلین ان کی موجودگی میں بڑی بڑی کرامات کا مشاہدہ کیا کرتے تھے۔ بہت سے لوگوں کو ان کی رفاقت میں ایک بھرپور روحانیت کا احساس ہوتا تھا۔ ان کی ایک عظیم کرامت یہ ہے کہ موت کے وقت اکثر ان کے مریدوں کے ہونٹوں پر "لا الہ الا اللہ" کے الفاظ جاری ہو جاتے ہیں، جو کہ ایک اچھی موت کی علامت ہے۔

اپنے ہم عصر سید محمد بادشاہ حسینی کی وفات کے کچھ عرصہ بعد، 25 اگست 1964 کو، مولانا عبداللہ شاہ نے پیشین گوئی کی کہ وہ دو دن کے بعد اس دنیا سے رخصت ہو جائیں گے۔ آپ کی پیشین گوئی سچ ثابت ہوئی، اور آپ 18 ربیع الثانی 1384ھ (1964ء) کو 92 سال کی عمر میں اپنے خالق حقیقی سے جا ملے۔

ان کے جنازے میں 250,000 سے زیادہ لوگوں نے شرکت کی، جو کہ حیدرآباد کی تاریخ کے سب سے بڑے جنازوں میں سے ایک ہے۔ مولانا عبداللہ شاہ نقشبندی چمن، مصری گنج، حیدرآباد میں سپرد خاک ہوئے۔

میراث اور جانشینی

مولانا عبداللہ شاہ کی روحانی اور فکری وراثت ان کے شاگردوں اور اولاد میں اب تک زندہ ہے۔ ان کے بعد ان کے بڑے بیٹے ابوالبرکات سید خلیل اللہ شاہ آپ کی گدی پر بیٹھے۔ ان کے بعد ابوالخیرات سید انوار اللہ شاہ نے ان کی جگہ لی۔ موجودہ سجادہ جانشین ابوالفیض سید عطاء اللہ شاہ ہیں، اور نقشبندی چمن کے موجودہ سجادہ نشین ابوالخیر سید رحمت اللہ شاہ ہیں۔

ابوالحسنات اسلامک ریسرچ سنٹر، مفتی سید ضیاء الدین نقشبندی قادری کا قائم کردہ ایک عظیم ادارہ ہے، جہاں مولانا عبداللہ شاہ کی تمام تصانیف کو عام کیا جا رہا ہے۔

---------------

English Article: Legacy of Muhaddith-e-Deccan Hazrat Abdullah Shah Naqshbandi

 URL: https://newageislam.com/urdu-section/legacy-muhaddith-deccan-hazrat-abdullah-naqshbandi/d/133570

New Age Islam, Islam Online, Islamic Website, African Muslim News, Arab World News, South Asia News, Indian Muslim News, World Muslim News, Women in Islam, Islamic Feminism, Arab Women, Women In Arab, Islamophobia in America, Muslim Women in West, Islam Women and Feminism