Fri Apr 25 2025, 04:59 PM

Urdu Section ( 21 Jan 2023, NewAgeIslam.Com)

Jews Did Not Originally Inhabit Khaybar; Rather, They Were Visitors to the Arabian Peninsula- Part-119 ارضِ خیبراصلاً یہودیوں کا علاقہ نہیں ، وہ جزیرۂ عرب میں مہمان بن کرداخل ہوئے تھے

مولانا ندیم الواجدی

20 جنوری 2023

غزوہ خیبر کا پس منظر

خیبر ایک شہر کا نام ہے، مدینہ منورہ سے اس کا فاصلہ تقریباً ۱۶۵؍ کلو میٹر ہے، سطح سمندر سے اس کی بلندی ۸۵۴؍میٹر ہے۔ شمال کی جانب شام کی طرف جانے والی شاہراہ تبوک پر واقع ہے۔ یہ علاقہ شروع ہی سے بڑا سر سبزوشاداب اور زرخیز رہا ہے، یہاں پانی کی فراوانی ہے، کھجوروں کے باغات کثرت سے ہیں، دوسرے پھل بھی وافر مقدار میں پیدا ہوتے ہیں۔ زمین قابل کاشت ہے اس لئے سبزیاں اور غلّہ جات بھی اگائے جاتے ہیں۔ خیبر بڑی بڑی وادیوں پر مشتمل ہے اور آبادی بھی اچھی خاصی ہے۔

ارضِ خیبر شروع ہی سے بڑی زرخیز رہی ہے، اگرچہ یہاں بعض علاقے ایسے بھی ہیں جہاں سیاہ پتھریلی چٹانیں زمین میں ابھری ہوئی ہیں۔ کہتے ہیں کسی زمانے میں یہاں آتش فشاں پہاڑوں میں دھماکہ ہوا تھا جس سے کئی پتھریلی وادیاں بن گئی ہیں اس کے باوجود یہاں کی زمین کا بڑا حصہ قابل کاشت ہے، جس میں یہودیوں نے کھجوروں کے بڑے بڑے باغ لگارکھے تھے۔ صرف خیبر کے باغوں میں درختوں کے ۴۸؍ہزار جھنڈ تھے، باغات میں غلّے کی کاشت بھی ہوتی تھی۔ فی الحال اس علاقے میں قبیلۂ عنزہ کی نسل کے لوگ رہتے ہیں جو غرس سے نورشیر تک جانے والی پوری وادی میں سکونت پزیر ہیں۔ سرکار دو عالم، رسول اللہ صلی اللہ علیہ وسلم کے زمانے میں یہاں ملی جلی آبادی تھی، عرب بھی تھے، اور یہود بھی ، آخر الذکر قوم کی اکثریت تھی اور وہ اس علاقے میں مرکزی حیثیت اختیار کئے ہوئے تھے۔

ارضِ خیبر اصلاً یہودیوں کا علاقہ نہیں ہے بلکہ جزیرۂ عرب میں یہ لوگ مہمان بن کر داخل ہوئے تھے۔ قوقاز اور شام کے علاقوں میں جب یہودی اپنے کرتوت کی وجہ سے مقابل قوموں کی جارحیت کا نشانہ بنے تو انہوں نے اسی میں عافیت سمجھی کہ وہ ان علاقوں کو چھوڑ کر کسی اور جگہ کا رخ کریں۔ یہودی اس جگہ جہاں آج خیبر ہے پہنچے تو انہوں نے وہاں کے عرب باشندوں سے درخواست کی کہ وہ انہیں یہاں قیام کی اجازت دے دیں، عرب شروع ہی سے فیاض اور دریا دل واقع ہوئے ہیں، ان کی مہمان نوازی اور مظلوموں کے تئیں ان کی نرم مزاجی بھی مشہور ہے، اس لئے یہودیوں کو سہولت کے ساتھ اس علاقے میں بسنے کی اجازت مل گئی۔ یہ محنتی اور جفاکش قوم ہے، اگرچہ سازشی ذہن بھی رکھتی ہے، اور احسان فراموشی میں تو اس کا کوئی ثانی ہی نہیں،چنانچہ یہ لوگ جلد ہی خیبر میں چھا گئے، وہاں کی زمینوں کو قابل کاشت بناکر انہوں نے کھجور کے باغات لگائے اور مزے سے زندگی بسر کرنے لگے۔ یثرب یہاں سے قریب تھا، کچھ یہودی قبیلے وہاں بھی منتقل ہوگئے۔ تبّع بادشاہ کے زمانے میں بھی کافی یہودی یہاں بس گئے تھے۔

جس وقت رسول اکرم صلی اللہ علیہ وسلم ہجرت کرکے مدینہ تشریف لائے اس وقت یہودیوں کے کئی بڑے قبیلے جیسے بنو قینقاع، بنو نظیر اور بنو قریظہ یہاں آباد تھے۔ اہل کتاب ہونے کی وجہ سے یہودیوں سے یہ امید تھی کہ وہ اس آسمانی دعوت کو جو رسول اللہ صلی اللہ علیہ وسلم لے کر تشریف لائے تھے قبول کرنے میں پس وپیش نہیں کریں گے، مگر انہوں نے اس دعوت پر لبیک کہنے کے بجائے اس کے خلاف معاندانہ رویّہ اختیار کیا، مشرکینِ عرب بالخصوص مشرکینِ مکہ کے ساتھ مل کر انہوں نے اسلام اور مسلمانوں کے خلاف سازشیں شروع کردیں۔ یہودیوں کا ایک مشہور قبیلہ تھا بنوقریظہ، رسول اللہ صلی اللہ علیہ وسلم نے بعض دینی مصلحتوں کی بنا پر اس قبیلے سے اتحاد باہمی کا معاہدہ کرلیا تھا۔ اس معاہدے میں یہ دفعہ بھی شامل تھی کہ وہ مسلمانوں پر ہونے والے کسی بھی حملے میں دشمن کا ساتھ نہیں دیں گے بلکہ مسلمانوں کی حمایت کریں گے اور ان کے ساتھ مل کر لڑیں گے۔ لیکن جب قریشِ مکہ دس ہزار کا لشکر لے کر مدینہ منورہ پر حملہ کرنے کے ارادے سے آئے تو بنو قریظہ نے رسول اللہ صلی اللہ علیہ وسلم سے کیا ہوا عہد توڑ کر قریش کی مدد کی۔ سابقہ قسطوں میں، غزوۂ خندق کے بیان میں اس کی تفصیل آچکی ہے۔اس غزوہ سے فراغت کے بعد اللہ تعالیٰ نے اپنے نبی ﷺ کو حکم دیا کہ وہ ابھی ہتھیار نہ رکھیں بلکہ بنو قریظہ کو ان کی بدعہدی اور غداری کی سزا دیں، چنانچہ مسلمانوں نے ۲۵؍ روز تک بنو قریظہ کا محاصرہ کیا، بالآخر وہ ہتھیار ڈالنے پر مجبور ہوگئے اور اپنے انجام کو پہنچے۔

اس سے پہلے بنو نضیر کو مدینے سے جلا وطن کیا گیا تھا۔ اس قبیلے کے زیادہ تر افراد یہاں سے نکل کر خیبر میں آباد ہوگئے تھے جن میں ان کے زعماء بھی تھے۔ اس واقعے سے بہت پہلے معرکہ ٔ بدر کے بعد بنو قینقاع نے بھی اسی طرح کی حرکتیں کی تھیں۔ ان سے بھی کہا گیا تھا کہ وہ لوگ مدینہ اور مضافاتِ مدینہ چھوڑ کر چلے جائیں۔ ان قبیلوں کے زیادہ تر لوگ مدینے سے تو نکل گئے مگر خیبر میں جاکر آباد ہوگئے، اس طرح ان کی آبادی بڑھ گئی، ان کی طاقت میں بھی اضافہ ہوگیا، اور چونکہ یہ قبائل تجارت پیشہ تھے اس لئے خیبر پہنچ کر بھی انہوں نے اپنا پیشہ برقرار رکھا جس سے ان کی اقتصادی حالت بھی مضبوط سے مضبوط تر ہوتی چلی گئی۔ غرض یہ کہ مدینے سے جلاوطن ہونے والے بنو نضیر اور بنو قینقاع کے بہت سے فسادی لوگ خیبر میں جمع ہوگئے اور اپنے مذہبی بھائیوں کی سازش میں شریک ہوگئے۔ اس طرح یہ علاقہ جزیرۃ العرب میں یہودیوں کی طاقت کا سب سے بڑا مرکز بن گیا ، ان کے قلعوں میں بیس ہزار مسلح افواج ہمہ وقت موجود رہتی تھیں۔

خیبر کے یہود بھی اسلام دشمنی میں بنو قریظہ سے کم نہ تھے، انہوں نے بھی غزوۂ احزاب کے موقع پر قریش کی بھرپور مدد کی تھی، اس لئے ضروری تھا کہ ان کو بھی سبق سکھایا جائے، بنو نضیر کے سردار حُيّ بن اَخطَب کے قتل کے بعد سلاّم بن أبی الحقیق (ابورافع عبد اللہ) یہود کا سربراہ مقرر ہوا تھا۔ اس نے خیبر کو مسلمانوں کے خلاف سازشوں کا مرکز بنالیا تھا، وہ اسلام کے خلاف مسلسل زہر اگلا کرتا تھا اور آس پاس کے قبیلوں کو مسلمانوں کے خلاف بھڑکاتا تھا۔ رسول اللہ صلی اللہ علیہ وسلم نے عبد اللہ بن عتیکؓ کو خفیہ مہم پر بھیجا جنہوں نے اسے کیفرکردار تک پہنچا دیا، اس کے بعد یسیر بن ازام خیبر کا سردار بنا، وہ بھی اپنے پیش رؤوں کے نقش قدم پر چلا۔ آپ صلی اللہ علیہ وسلم نے اسے فہمائش بھی کی اور عبد اللہ بن اُنیس اور عبد اللہ بن رواحہ کو بھیج کر اسے یہ پیشکش بھی کی کہ وہ مدینہ آکر صلح کی بات چیت کرے۔ وہ مذاکرات کے لئے روانہ بھی ہوا، راستے میں اس نے حضورؐؐ کے قاصدوں کو نہتا کرنے کی کوشش کی جس سے کشیدگی پیدا ہوگئی، دونوں طرف سے تلواریں نکل آئیں اور یسیر بن رزام مارا گیا۔ اس واقعے کے بعد اہل خیبر سے مصالحت کی کوئی امید باقی نہیں رہی ۔چونکہ آپ صلی اللہ علیہ وسلم کو ابھی تک خیبر پر چڑھائی کرنے کا حکم نہیں ملا تھا، اس لئے سن چھ ہجری کے اختتام تک انہیں مہلت ملتی رہی۔ گزشتہ صفحات میں صلح حدیبیہ کا ذکر آیا ہے، سرور کائنات ؐ اپنے ۱۴؍ سو اصحاب ؓ کے ساتھ بغرض عمرہ تشریف لے گئے تھے مگر قریش نے جانے نہیں دیا۔ آپؐ نے بعض مصالح کی بنا پر مصالحت کرلی اور عمرہ کئے بغیر واپس تشریف لے آئے، آپؐ اور تمام صحابہ احرام پہنے ہوئے تھے، مصالحت کے بعد سب نے قربانی کی، حلق کرایا اور احرام کھول دیا۔

سورۂ فتح کا نزول

ابھی راستے ہی میں تھے کہ سورۂ فتح نازل ہوئی، اس میں اللہ رب العزت نے یہ وعدہ فرمایا کہ تمہیں بہت سی فتوحات حاصل ہوں گی، اور بڑی غنیمتیں تمہارے ہاتھ آئیں گی، ایک فتح تو بہت جلد حاصل ہونے والی ہے، اور مکہ مکرمہ میں بھی تم لوگ عنقریب فاتح بن کر داخل ہوگے۔

اس سورہ میں دوآیتیں ہیں:

’’بیشک اﷲ مومنوں سے راضی ہو گیا جب وہ (حدیبیہ میں) درخت کے نیچے آپ سے بیعت کر رہے تھے، سو جو (جذبۂ صدق و وفا) ان کے دلوں میں تھا اﷲ نے معلوم کر لیا تو اﷲ نے ان (کے دلوں) پر خاص تسکین نازل فرمائی اور انہیں ایک بہت ہی قریب فتح (خیبر) کا انعام عطا کیا۔اور بہت سے اموالِ غنیمت (بھی) جو وہ حاصل کر رہے ہیں، اور اﷲ بڑا غالب بڑی حکمت والا ہے۔‘‘ (الفتح:۱۹۔۱۸)

مفسرین کہتے ہیں کہ ان آیتوں میں جس فتح کا ذکر ہے اس سے فتح خیبر مراد ہے، (تفسیر الطبری: ۲۲/۲۲۸، تفسیر البغوی: ۷/۳۰۶، تفسیر فتح القدیر: ۶/۴۱۷)

یہی وہ حالات ہیں جن کی وجہ سے خیبر پر حملہ کرنے کا منصوبہ بنا، اور اس پر بلا تاخیر عمل بھی ہوا۔ اگر رسول اللہ صلی اللہ علیہ وسلم اس طرف سبقت نہ فرماتے تو خیبر کے یہود خود ہی مدینے پر حملہ کردیتے کیونکہ اس سمت میں اُن کی تیاریاں پورے طور پر جاری تھیں۔

Urdu Section ( 21 Jan 2023, NewAgeIslam.Com)

Jews Did Not Originally Inhabit Khaybar; Rather, They Were Visitors to the Arabian Peninsula- Part-119 ارضِ خیبراصلاً یہودیوں کا علاقہ نہیں ، وہ جزیرۂ عرب میں مہمان بن کرداخل ہوئے تھے

Loading..

Loading..