Mon Nov 10 2025, 06:33 PM

Urdu Section ( 4 Nov 2025, NewAgeIslam.Com)

Comment | Comment

History and Civilization of Islam-Part-65 تاریخ وتمدن اسلام

خلیق احمد نظامی

(حصہ۔65)

27اکتوبر،2025

تراش از حیشہ خود جادہ خویش

براہ دیگراں رفتن عذاب است

ایک بار سید صباح الدین عبدالرحمن صاحب نے ہندوستان کے مسلمان حکمرانوں کے فوجی نظام پر تحقیقی کام میں دشواری کاذکر کیا، توفرمایا کہ دشوار گزار راہیں طے کرنے کے بعد ہی تحقیق کے رموز سے واقفیت ہوسکتی ہے۔ لیکن مولانا سید سلیمان ندویؒ کا یہ کمال ہے کہ تصنیف وتالیف میں اس قدر محنت اور مشقت کے باوجود کہیں آبلہ پائی کی شکایت یا تھکن کااثر ان کی تحریروں میں محسوس نہیں ہوتا۔پڑھنے والوں کو ان کی محنت کے ثمر تونظر آتے تھے، لیکن جس طرح وہ خون جگر سے اس کشت ویران کی آبیاری کرتے تھے، بہت کم لوگ اس کو دیکھ سکتے تھے۔

(5) مولانا سید سلیمان ندویؒ مسائل فقہ پر مجتہدانہ نظررکھتے تھے۔ وہ عصری رجحانات او رغور وفکر کرتے تھے، او رمسائل پررائے قائم کرنے پر بڑی احتیاط اور تدبر سے کام لیتے تھے۔علامہ محمد اقبال نے جب بھی فقہی مسائل پران کی رائے معلوم کی، ان کے جوابات کو نہ صرف شافی پایا، بلکہ ان میں فکر کی نئی روشنی محسو س کی۔ اجماع، قیاس، نص، ناسخ و منسوخ وغیرہ پر اقبال نے ان کے خیالات سے استفادہ کیا، اور شاہ ولی اللہؒ کی ’حجتہ اللہ البالغہ‘ کے بعد اجزاء کا مفہوم بھی ان سے سمجھا۔علامہ اقبال نے Reconstruction of Religious Thought in Islam میں جس انداز سے بعض مباحث کو اٹھایا ہے، اس پرمولانا سید سلیمان ندویؒ کے افکار کا اثر محسوس ہوتاہے۔ بعض جگہ علامہ محمد اقبال کی فکر اجتہادی منزلوں کو قطع کرتے کرتے ایک دم سے رک گئی ہے۔ممکن ہے کہ سید صاحبؒ ہی نے بعض مسائل میں ایک حد سے آگے بڑھنے سے روکا ہو۔ علامہ محمد اقبال کی نظر میں مولانا سید سلیمان ندویؒ کے افکار کی جواہمیت تھی اس کا اندازہ سے لگایا جاسکتا ہے کہ وہ اپنی عادت کے خلاف سید صاحبؒ کے مکتوبات کوبڑی حفاظت سے رکھتے تھے۔ بھوپال ان کی مجتہدانہ فکر کے سفر میں ایک منزل تھی افکار کو عملی جامہ پہنانے کی۔ اپنی راہ سے ہٹنا مقصود نہیں تھا۔مولانا مسعود عالم ندویؒ کو 26دسمبر1947 ء کے ایک خط میں بھوپال سے لکھتے ہیں: ”یہاں بھی بفضل الہٰی کچھ دینی کام انجام پارہے ہیں“۔

(6) عالم اسلام کی تحریکوں او رفکری رجحانات سے باخبر رہنے کے لیے مولانا سید سلیمان ندویؒ بڑی جستجو کرتے تھے۔علامہ محمد اقبال سے اس سلسلہ میں تبادلہ خیال بھی ہوتا رہتا تھا۔مفتی عالم جان کی تحریک کی نوعیت پر علامہ محمد اقبال نے سید صاحب کی رائے دریافت کی تھی۔ افغانستان میں قدیم وجدید نظریات کے تصادم کو خود انہوں نے دیکھا تھا، ترکی کے اصلاحی رجحانات پرکڑی نظررکھتے تھے، اور گو تحریک خلافت کے پس منظر نے اس کام کو مشکل بنادیا تھا، وہ کھلے باغ سے ان کا مطالعہ کرتے تھے۔قیام لندن کے زمانہ میں شامی، مصری، تیونسی علماء سے طویل گفتگو ئیں رہی تھیں۔مفتی اعظم فلسطین اوروہ خود موتمر عالم اسلامی کے نائب صدر منتخب کیے گئے تھے۔ وہ اس ذہنی او رفکر ی ہیجان سے پوری طرح واقف تھے جو اسلامی دنیا میں برپا تھا۔ویسے عالم اسلام کی تحریکوں، دینی رجحانات، عوامل ونظریات کا جو براہِ راست مطالعہ مولانا سید ابوالحسن علی ندوی صاحب نے کیاہے، وہ کسی دوسرے ہندوستانی عالم کو میسر نہیں آیا۔ او رمولانا سید سلیمان ندویؒ کی نگاہ نے بھی ان اثرات کا اندازہ لگالیا تھا جومولانا سید ابوالحسن علی ندوی نے عرب ممالک میں اس وقت پیدا کردیے تھے۔ ایک خط میں 24جنوری 1950ء کو مولانا سید سلیمان ندویؒ ان کو حجاز کے تجربات کے سلسلہ میں لکھتے ہیں:

”بے شبہ جو چیز آپ کے لیے آثار سعادت میں سے ہے وہ یہ ہے کہ بحمداللہ تعالیٰ دوسال گزر نے کے بعد آپ کے نام او رکام کو میں نے زندہ پایا، بلکہ آپ کی نسبت سے مجھے بزرگی ملتی رہی“۔

(7) سید صاحبؒ کی علمی خصوصیات کاایک اہم پہلو یہ بھی تھا کہ انہوں نے مغرب کے علمی رجحانات او رسائنس کے انکشافات سے اپنے آپ کو بے خبر نہیں رکھا تھا۔ سائنسی ایجادات پر وہ کھلے دماغ سے غور کرتے تھے، او ران کے اثرات کا جائزہ لیتے تھے۔ ان کے رسالہ ’معارف‘کے صفحات ’اخبار علمیہ‘ کے عنوان سے نئے اور اہم معلومات سے بھرے ہوئے ہیں۔مثال کے طور پر جون 1920 ء کا ’معارف‘ لے لیجئے، اس میں سرجے۔سی۔بوس اور راما نجم کی تحقیقات علمی کا ذکر ہے، راما نجم کی جواں سال موت پر۔

خوش درخشید ولے دولت مستعجل بود

کہہ کر رنج کااظہار کرتے ہیں۔ مانچسٹر یونیورسٹی میں چندہ جمع کرنے کی تدابیر کا ذکر تعجب سے کرتے ہیں۔ یورپ میں ریویو نگاری کے اصول پر بحث کرتے ہیں۔نائٹروجن کے متعلق جدید تحقیقات کاذکر کرتے ہیں۔ ڈاکٹر آگسٹن والر، ڈاکٹر رابرٹ بل، پروفیسر میکسول لی فرائے کی تحقیقات سے روشناس کراتے ہیں۔ Radiographic Cancer Machine کی ایجاد کی خبر دیتے ہیں۔ نیویارک میڈیکل سوسائٹی کے صدر ڈاکٹر فیسک کے لیکچرس کاتذکرہ کرتے ہیں۔کرہئ ارض او رکرہئ مریخ سے متعلق سائنس کی تحقیقات بیان کرتے ہیں۔ ڈاکٹر ملیز کے رصد خانہ کی تفصیل سے آگاہ کرتے ہیں۔ یہ ایک مہینے کے معارف کے معلومات کا حال ہے۔ بعض اوقات عالمی علمی رفتار میں اس دلچسپی کو دیکھ کر ذہن ان عوامل واسباب کے تجزیہ کی تلاش کرنے لگتا ہے جن کے باعث یہ رجحانات کسی مثبت نتیجہ پر نہ پہنچ سکے، اور مغربی او رمشرقی علوم کے درمیان کوئی پل نہ بنایا جاسکا۔ مولانا سید سلیمان ندویؒ مغربی علوم کے نظریات سے واقفیت کو،بقول اقبال، ’بولہب راحیدر کرارکن‘ کام لیتے تھے۔

(8)سید صاحبؒ اسلامیات کے سلسلہ میں ہندوستانی یونیورسٹیوں او رطلبہ کے اس طریقہ کارکوکہ مستشرقین کی کتابوں کو بنیاد بناکر تحقیق کی جاتی ہے، بڑی تشویش کی نگاہ سے دیکھتے تھے۔ اس سلسلہ میں انہوں نے خاص طور پر انسائیکلوپیڈیا آف اسلام، میکڈونالڈ(Macdonald) کی Development of Muslim Theology, Jurisprudence and Constitional Theory، ہیوز (Hughes) کی Dictionay of Islam اور اگنیدس (Aghnides)کی Mohammadan Theories of Finance کا ذکر کیا ہے۔(جاری)

------------------

Related Article: History and Civilization of Islam تاریخ وتمدن اسلام

Related Article: History and Civilization of Islam-Part-2 تاریخ وتمدن اسلام

Related Article: History and Civilization of Islam-Part-3 تاریخ وتمدن اسلام

Related Article: History and Civilization of Islam-Part-4 تاریخ وتمدن اسلام

Related Article: History and Civilization of Islam-Part-5 تاریخ وتمدن اسلام

Related Article: History and Civilization of Islam-Part-6 تاریخ وتمدن اسلام

Related Article: History and Civilization of Islam-Part-7 تاریخ وتمدن اسلام

Related Article: History and Civilization of Islam-Part-8 تاریخ و تمدنِ اسلام

Related Article: History and Civilization of Islam-Part-9 تاریخ و تمدنِ اسلام

Related Article: History and Civilization of Islam-Part-10 تاریخ وتمدن اسلام

Related Article: History and Civilization of Islam-Part-11 تاریخ وتمدن اسلام