Mon Nov 10 2025, 07:52 PM

Urdu Section ( 12 Oct 2025, NewAgeIslam.Com)

History and Civilization of Islam-Part-43 تاریخ وتمدن اسلام

خلیق احمد نظامی

(حصہ۔43)

4 اکتوبر،2025

سرسید اس دور کی عظیم شخصیت تھے جن کاحلقہ اثر ورسوخ بہت دور تک پھیلا ہوا تھا۔ ان کا خاندان ان سید احمد شہیدؒ سے خصوصی تعلق رکھتاتھا۔خود ان کی والدہ سیداحمد شہیدؒ سے بیعت تھیں۔ ’آثار الصنادید‘ میں انہوں نے جس طرح سید شہیدؒ کاذکر کیا ہے، اس سے ان کی گہری عقیدت او ر بے پناہ تعلق کااندازہ ہوتاہے۔ حالی نے’حیات جاوید‘ میں لکھا ہے کہ مولانا اسمٰعیل شہیدؒ کے خیالات او ر تصانیف نے سرسید کے خیالات پر اثر ڈالا تھا۔سرسید کے بیٹے سید محمود راے بریلی کے ڈسٹرکٹ جج رہے تھے۔وہاں انہوں نے انجمن اسلامیہ کی بنیاد ڈالی، جس نے ایک مدرسہ اسلامیہ بھی قائم کیا۔سرسید رائے بریلی تشریف لائے تو اس مدرسہ میں بھی گئے او ر کچھ بچوں کا امتحان بھی لیا۔ان بچوں میں مولانا سید عبدالحیؒ بھی شامل تھے۔ بایں ہمہ تعلق مولانا عبدالحیؒ نے سرسیدکے بعض خیالات کی تردید میں پورے اعتماد سے کام لیا، اور ایک مفصل خط اس سلسلہ میں سرسید کو لکھا۔ اس کی زبان اور انداز بیان، باوجود اختلاف عقائد، شرافت نفس کا ترجمان ہے۔سرسید کے محض مذہبی افکار سے ان کے بعض قریبی دوست اور ساتھی بھی متفق نہیں تھے اس خط کو اسی پس منظر میں دیکھنا چاہیے۔

علامہ مولانا سید عبدالحیؒ کی اساس فکر او رعلمی کارناموں کامطالعہ ہندوستان میں اسلامی علوم وفنون کے وسیع وعریض تاریخی میدان میں لے جاتاہے اور پردہ ذہن پر تصویر وں کا ہجوم ہونے لگتا ہے:

از خیال توبہر سو کہ نظر میکردم

پیش چشمم درو دیوار مصور می شد

مولانا سید ابوالحسن ندوی مدظلہ کی سرگرمیاں ان کے خوابوں کی تعبیر اور ان کے کاموں کی تکمیل ہیں:

تونخل خوش ثمر کیستی کہ باغ وچمن

ہمہ ز خویش بریدند ودرتو پیوستند

’حکیم فخرالدین خیالی: حیات اورکارنامے‘

حکیم سید فخرالدین خیالی (1841-1908ء) کی ایک ضخیم تالیف ’مہر جہانتاب‘ ہے۔مضامین کے اعتبار سے یہ ایک گرانقدر دائرۃ المعارف ہے۔ڈاکٹر ہارون رشید صاحب نے اس کتاب کاایک جزو، جو اردو شعراء کے تذکرہ پرمشتمل ہے، حواشی و تعلیقات کے ساتھ یہاں پیش کیا ہے۔ مرتب نے جب صاحب’مہر جہانتاب‘ کے حالات کو ترتیب دینا چاہا، تو خاندانی پس منظر اور روایات پرنظرڈالنی ضروری ہوگئی اور تصویر کو مکمل کرنے کے لیے اولاد احفاد کا تذکرہ بھی ناگریز ہوگیا۔ اس طرح ایک علمی خانوادہ کی بصیرت افروز تاریخ مرتب ہوگئی۔ہندوستان میں ثقافت اسلامی کی تاریخ اورعلوم اسلامی کے نشوونما کو سمجھنے کیلئے اس طرح وسیع پس منظر میں ادبی کاوشوں کا تجزیہ بہت معنی خیز ہوجاتاہے۔

دعوت وعزیمت، ارشاد وتلقین ،علم و فضل،سلوک وعرفان، سخنوری اور سخن شناسی کاشاید ہی کسی خاندان میں وہ اجتماعی ہوا ہو جو راے بریلی کے دائرہ شاہ علم اللہ میں بسنے والے خانوادہ کو قسام ازل نے ارزانی فرمایا اور جو آج تک اس خاندان کا طرّہ امتیاز ہے۔ اتباع سنت میں کوشش کی تو’علم اللہ‘ بن گئے اور نگ زیب عالمگیر نے ان کی وفات پرخواب دیکھا کہ حضور صلی اللہ علیہ وسلم کا وصال ہوگیا او رعلماء عصر نے یہ تعبیر بیا ن کی کہ حاملِ شرع او رعاملِ سنت ’علم اللہ‘ نے جہاں فانی سے کوچ کیا۔ عزیمت اور سرفروشی نے پکارا توسید احمد شہیدؒ کی شکل میں

بناکر دند خوش رسمے بخون وخاک غلطیدن

کی تصویر پیش کردی۔ ہندوستان میں اسلامی علوم اور تمدّن کے نقوش کے تحفظ کی ضرورت پیش آئی تو ’نزہۃ الخواطر‘ اور ’الثقافتہ الاسلامیہ فی الہند‘ لکھ کر آنے والی نسلوں کے لیے حکیم سید عبدالحیؒ نے روشنی کے مینارے کھڑے کردیئے۔ علم کا پورا خون جگر سے آبیاری کے بغیر برگ وہار نہیں لاتا۔دائرہ علم اللہی میں علم وفضل کی روایت کی آبیاری تین سو سال تک کی گئی ہے، جب ’تاریخ دعوت وعزیمت‘ نے فکر کا پیکر اختیار کیا ہے۔ علم دار شاد کی اتنی طویل روایت ہندوستان کے بہت ہی کم خاندانوں کو نصیب ہوئی ہے۔

خیالی کے اجداد ہندوستان کے قدیم ترین مسلم خاندانوں کی طرح ایلتتمش کے دورِ حکومت میں ہندوستان آئے تھے۔ عصامی نے اس زمانہ میں آنے والے علماء کے متعلق لکھا ہے۔

بسے سیدا ن صحیح النسب

رسیدند دردے ز ملک عرب

بسے عالمان بخارا نژاد

بسے زاہد وعابد ازہر بلاد

حکیمان یونان طبییان روم

بسے اہل دانش زہر مرزبوم

دراں شہر فرخند ہ جمع آمدند

چوپروانہ برنور شمع آمدند

ضیاء الدین برنی نے ’تاریخ فروزشاہی‘ میں اس خاندان کے مورث اعلیٰ شیخ الاسلام سید قطب الدین کاذکر کیا ہے۔ ان کے بیٹے سید تاج الدین اورپوتے سید رکن الدین نے بدایوں، کزہ مانک پور، اور اودھ کے مختلف علاقوں میں قضاکی خدمت انجام دی تھی۔اسی خاندان تصدّرد تقویٰ میں سید شاہ علم اللہ نے آنکھ کھولی۔ ابتدائی زمانہ میں شاہجہاں کی ملازمت میں تھے، بعد کوملازمت شاہی سے دستبردار ہوکر اپنی زندگی تزکیہ باطن میں گزاردی۔ خواجہ آدم بنوریؒ سے نقشبندی سلسلہ سے اس خاندان کاتعلق استوار ہوا۔کہتے ہیں کہ ایک مجذوب شاہ عبدالشکور نے ان کو اس جگہ قیام کا مشورہ دیا تھا جواب ’تکیہ شاہ علم للہ‘ کے نام سے مشہور ہے۔شاہ علم اللہ کے پوتے کے پوتے سید احمد شہیدؒ تھے، جن کی سحر کار آواز، بقول مولانا سید سلیمان ندوی، ہمالیہ کی چوٹیوں او رنیپال کی ترائیوں سے لے کر خلیج بنگال کے کنارو ں تک یکساں پھیل گئی تھی۔

خیالی کے والد مولانا میر عبدالعلی سیداحمد شہیدؒ سے تعلق نسب کے علاوہ نسبت ارادت بھی رکھتے تھے۔سرکاری ملازمت کے باوجود زہدواتقا کی زندگی بسرکرتے تھے اور فطرتاً درویش دوست اور درویش منش تھے۔

میر عبدالعلی کی شخصیت بعض اعتبار سے بڑی دلکش تھی۔ ایک طرف سید احمد شہیدؒ سے نسبت نے طبیعت کا رنگ متعین کیا تھا، دوسری طرف نقاشی، خطاطی اور شاعری ان کی فطرت میں تھی۔ عربی میں علی، اور فارسی میں ہجر تخلص کرتے تھے۔ ان کے فرزند حکیم سید فخرالدین خیالی کا مزاج عالمانہ اور جذبات شاعرانہ تھے۔ مطالعہ وسیع اورنظرگہری تھی۔(جاری)

--------------------

URL: https://newageislam.com/urdu-section/history-civilization-islam-part-43/d/137204

New Age Islam, Islam Online, Islamic Website, African Muslim News, Arab World News, South Asia News, Indian Muslim News, World Muslim News, Women in Islam, Islamic Feminism, Arab Women, Women In Arab, Islamophobia in America, Muslim Women in West, Islam Women and Feminism

Donate Now

Urdu Section ( 12 Oct 2025, NewAgeIslam.Com)

History and Civilization of Islam-Part-43 تاریخ وتمدن اسلام

Loading..

Loading..