Wed Nov 19 2025, 12:45 PM

Urdu Section ( 8 Oct 2025, NewAgeIslam.Com)

Comment | Comment

History and Civilization of Islam-Part-39 تاریخ وتمدن اسلام

خلیق احمد نظامی

(حصہ۔39)

30 ستمبر،2025

ان سے توحالی کا صرف یہ شعر کہا جاسکتاہے

انہوں نے خود غرض شکلیں کبھی دیکھی نہیں شاید

وہ جب آئینہ دیکھیں گے تو ہم دکھلائیں گے ان کو

بعض معاندین نے عمداً ان کے جنگ آزادی کے عزائم کوغلط پیش کیا۔ بالاکوٹ کی فضائیں پکارتی رہیں۔

مرا کلچیں بدآموز چمن خواند

کہ دارم چشم نرگس را نگاہے

حقیقت یہ ہے کہ آزادی کی جدوجہد میں سید شہیدؒ کے کارنامے کبھی فراموش نہیں کیے جاسکتے۔

بنا کردندخوش رسمے بخاک وبخون غلطیدن

خدا رحمت کندایں عاشقان پاک طینت را

علامہ حکیم سید عبدالحی: اساس فکر او ر علمی کارنامے

علامہ حکیم سید عبدالحی ؒ کی ذات کو اگر علوم اسلامی کی دائرۃ المعارف کہا جائے تو اس میں کوئی مبالغہ نہ ہوگا۔ ان کے پیکرخاکی میں علوم ومعارف کی ایک وسیع دنیا آباد تھی، جس کوان کی شبانہ روز محنت نے ایک گل رعنابنادیا تھا۔ عربی دنیا کو انہوں نے ہندوستان کے ساڑھے چار ہزار سے زائد علماء ومشایخ کے علمی اور ادبی کارناموں سے روشناس کرایا اورعالم اسلام کے علمی نقشے میں ہندوستان کا مقام واضح کردیا۔ ہندوستان میں اسلامی ثقافت کا قافلہ جن منزلوں سے گزرا تھا اس کی ایسی نشاندہی کی کہ بہت سے تاریک گوشے روشن ہوگئے۔تاریخ کے میدان میں تلاش وتحقیق کی نئی راہیں ہموار کیں او رتاریخی مطالعہ میں ثقافت اور سیاست کے رشتہ کو دریافت کیا۔ اردو شعروادب کے تجزیہ میں تاریخی اور تنقیدی زاویوں کا اضافہ کیا۔ حدیث، تاریخ وسیر، تذکرہ، شعروسخن، طب، غرض جس میدان میں قد م رکھا اپنے کارناموں کا نہ مٹنے والا نقش ثبت کردیا۔ جب تاریخی ذہن ان کے کارناموں کا احاطہ کرنے کی کوشش کرتا ہے تو ایسا محسوس ہوتا ہے کہ۔

ایک چراغیست دریں خانہ کہ از پرتو آں

ہرکجا می نگری انجمنے ساختہ اند

جس شخص کا خاندانی ورثہ شاہ علم اللہ کا تعبددینی، سید احمد شہیدؒ کا جذبہ جہاد، مولانا فخر الدین خیالیؒ کی علمی روایات ہوں، جس نے مولانا امیرعلی ملیح آبادیؒ،مولانا فتح محمد تائبؒ، مولانا محمد نعیم فرنگی محلیؒ، قاری عبدالرحمن پانی پتیؒ، شیخ حسین محدث یمنیؒ کے سامنے زانوئے تلمذ کیا ہو، جس نے حضرت شاہ فضل کیا ہو، جس نے مولانا سید سلیمان ندویؒ کو نہ صرف عربی زبان وادب کے ابتدائی سبق پڑھائے ہوں،بلکہ اردو مضمون نویسی کی طرف رغبت دلائی ہو(یادرفتگان،ص 50)، جس کے نگارشاتِ علمی کو دیکھ کر نواب صدر یار جنگ حبیب الرحمن خاں شیروانی کاجی چاہے کہ ان کے قدم چوم لیں (خط، حیات عبدلحی، ص 311)،اس کے علمی مقام اور کارناموں کی صحیح نوعیت متعین کرنے کے لیے فکر ونظر کے متدادل پیمانے کافی نہیں ہوسکتے۔ ا س کے لیے بعض حقائق کاپیش نظر ہونا ازبس ضروری ہے تاکہ ان کی فکر کا صحیح پس منظر اور ان کے کارناموں کی حقیقی نوعیت کو سمجھا جاسکے۔

(1)علم کئی نسلوں کی مسلسل آبیاری کے بعد برگ وبار لاتاہے۔ یہ وہ پودا ہے جو فوراً پھل نہیں دیتا۔نسلیں اس میں خون جگر لگاتی ہیں، جب یہ پروان چڑھتا ہے۔ہندوستان میں اسلامی علوم وفنون کی تاریخ حقیقت میں ایسے خانوادوں کی جہدوسعی کی داستان ہے جن کی سرگرمیاں بعض صورتوں میں صدیوں پرپھیلی ہوئی نظر آتی ہیں۔ مثلاً خاندان مجددالف ثانیؒ، خاندان شیخ عبدالحق محدث دہلوی ؒ، خاندان علم اللہیؒ، خاندان ولی اللہی ؒ،خاندان کلیمیؒ، خاندان فرنگی محل وغیرہ۔

(2)علم وعمل یعنی علمی بصیرت او رجہاد کا جذبہ بہت کم بیک وقت ایک خاندان میں جمع ہوتاہے۔ یہ وہ امتیاز ہے جو علامہ حکیم سید عبدالحیؒ کے خاندان کو حاصل ہوا۔ اس میں امیر قطب الدین محمد مدنیؒ جیسا خدا پرست، مولانا سید ہدایت اللہؒ جیسا فقہی علوم کا ماہر، سید خواجہ احمد نصیر آبادیؒ جیسا ماحی شرک وبدعت، او رشاہ علم اللہ جیسا متبع سنت نبوی پیدا ہوا۔پھر اسی خاندان کے ایک فرد سید احمد شہیدؒ نے جہاد وسرفروشی کا وہ علم بلند کیا کہ بقول مولانا آزاد،”دعوت واصلاح امت کے جو بھیدپرانی دہلی کے کھنڈروں او رکوٹلہ کے حجروں میں دفن کردیے تھے، اب اس سلطان وقت اور اسکندر عزم کی بدولت شاہ جہاں آباد کے بازاروں اور جامع مسجد کی سیڑھیوں پر ان کا ہنگامہ مچ گیا۔۔۔ اور خون شہادت کے چھینٹے حرف و حکایات کو نقوش وسوادبنا کر صفحہ عالم پرثبت کردیے“(تذکرہ،ص 370)۔اس طرح اس خاندان کے کارنامے مسنددرس سے لے کر مقتل شہادت تک یکساں پھیلے ہوئے ہیں۔ 1857 ء کے بعد جو متعددمقدمات بغاوت کے الزام میں انبالہ،پٹنہ، مالدہ وغیرہ میں چلائے گئے تھے، ان ہی خاندانوں کے خلاف تھے جنہوں نے تحریک جہاد میں سرکی بازی لگائی تھی اورجو سید شہیدؒ کے حلقہ مجاہدین سے تعلق رکھتے تھے۔

(3)سید شہیدؒ کی تحریک کاایک اہم مقصد’بیگانگانِ بعید الوطن‘ اور ’تاجرانِ متاع فروش‘ سے ملک کو نجات دلانا تھا،جیسا کہ انہوں نے راجہ گوالیار کوبوضاحت لکھا تھا۔اس مقصد کے حصول کیلئے انہوں نے شہادت کے جذبہ کواس قدر محبوب بنادیا تھا کہ ان کی جماعت مجاہدین کو سردار بھی چمن اندر چمن نظر آتے تھے۔ ہندوستان کی تاریخ میں یہ فضیلت ان ہی کے لیے مقدر تھی۔انہوں نے جہاد وسرفروشی کی ایسی فضا پیداکردی کہ اس کے زیراثر ایک طرف اگر مومن جیسا شاعر جو کوچہ رقیب میں سر کے بل چلتا تھا، ’مثنوی جہادیہ‘ میں پکاراٹھا۔

ایں عیسویاں بہ لب رساندند

جان من وجان آفرینش

خیز کہ شورِ کفر برخاست

اے فتنہ نشان آفرینش

تو دوسری طرف ٹیپوسلطان شہید کے خاندان کے شہزادوں کو اس تحریک میں آزادی کی وہی تڑپ نظر آئی جس نے ٹیپو سلطان کے قلب و جگر کو گرما یا تھا، اور وہ بے اختیار انہ اس میں شامل ہوگئے۔ جنگ بالاکوٹ کے 15 سال بعد بھی لوگوں کے جذبہ سرفروشی کا یہ عالم تھا کہ بقول سرسید ”ہر سال مجاہدین اوطان مختلفہ سے نیت جہاد اسی نواح کی طرف راہی ہواکرتے ہیں اور اس امرنیک کاثواب آپ کی روح مطہر کو پہنچتا رہتا ہے“(آثار الصنادید،ص103)۔(جاری)

-----------------

URL: https://newageislam.com/urdu-section/history-civilization-islam-part-39/d/137152

New Age Islam, Islam Online, Islamic Website, African Muslim News, Arab World News, South Asia News, Indian Muslim News, World Muslim News, Women in Islam, Islamic Feminism, Arab Women, Women In Arab, Islamophobia in America, Muslim Women in West, Islam Women and Feminism

Donate Now

Urdu Section ( 8 Oct 2025, NewAgeIslam.Com)

History and Civilization of Islam-Part-39 تاریخ وتمدن اسلام

Loading..

Loading..