Sat Apr 19 2025, 11:13 AM

Urdu Section ( 22 Oct 2022, NewAgeIslam.Com)

The Companions heartbroken by the Terms of Hudabiyya Pact were delighted to hear the news of Conquest of Makkah Part-106 شرائط صلح حدیبیہ سے دل گرفتہ صحابہ‘ فتح مبین ’ کی خوش خبری سن کر کھل اٹھے

مولانا ندیم الواجدی

21 اکتوبر ،2022

ابوجندل کی آمد اور واپسی

ابھی یہ معاہدہ لکھا ہی جارہا تھا کہ ایک مسلمان مکہ سے وہاں اس حال میں پہنچا کہ اس کے ہاتھوں میں زنجیریں پڑی ہوئی تھیں، صاف نظر آرہا تھا کہ وہ قید تھا او رکسی طرح چھٹ کر وہاں آپہنچا تھا، بے بسی او رکرب اس کے چہرے سے جھلک رہا تھا ، جسم پر زخموں کے نشان تھے ، گویا اسے قید ہی نہیں رکھا گیا تھا بلکہ اس کو اذیت بھی دی جارہی تھی ، وہ نوجوان آکر رسول اللہ کے قدموں میں گر پڑا ، صحابہؓ نے بڑھ کر اے اٹھایا اور اپنی حفاظت میں لے لیا، اس مسلمان کا نام تھا ابوجندلؓ، سہیل بن عمرو کے بیٹھے جو رسول اللہ صلی اللہ علیہ وسلم کے سامنے بیٹھ کر معاہدے کی شرائط لکھوا رہے تھے۔ انہوں نے ابوجندل کو دیکھا، باپ کے دل میں بیٹے کی محبت نہیں جاگی، بلکہ قومی حمیت جاگ گئی ، کہنے لگے ، یا محمد! معاہدے کی رو سے آپ ابوجندل کو واپس کردیں، رسول اللہ صلی اللہ علیہ وسلم نے فرمایا: معاہدہ لکھا جارہا ہے، ابھی اس پر عمل شروع نہیں ہوا ہے ، بلکہ دستخط تک بھی نہیں ہوئے ہیں۔ سہیل نے کہا: معاہدے کی تمام شرائط پر اتفاق ہوچکا ہے، آپ اس کو میرے ساتھ واپس کردیں۔ آپ صلی اللہ علیہ وسلم بار بار اپنی بات کا اعادہ کرتے رہے ،مگر سہیل بن عمرو اپنی ضد پر اڑے رہے، بالآخر رسول اللہ صلی اللہ علیہ وسلم نے ابوجندل کو ان کے حوالے کردیا۔

بڑی درد ناک صورت حال تھی، ایک مسلمان ، مشرک کی قید میں تھا اور عرصے سے ان کی اذیتیں جھیل رہا تھا، کسی طرح آزاد ہوکر مسلمانوں کے پاس آگیا ، مگراسے پھر اسی عذاب خانے میں بھیجا جارہا تھا۔ابوجندلؓ نے درد و غم کی تصویر بن کر انتہائی لجاجت او ربے بسی سے کہا: اے مسلمانو! کیا تم پھر مجھے انہی کافروں کے حوالے کررہے ہو جو مجھے میرے دین کی وجہ سے تکلیف پہنچارہے تھے ، انہوں نے مسلمانوں کو اپنے بدن کے زخم بھی دکھلائے ، مگر کیا ہوسکتا تھا، معاہدے پر عمل کرنا بھی ضروری تھا، یہ بڑا دل سوز منظر تھا ، رسول اللہ صلی اللہ علیہ وسلم نے ابوجندل سے فرمایا: ‘‘ ابوجندل! صبر کرو، او راللہ سے یہ امید رکھو کہ وہ عن قریب تمہاری رہائی او رنجات کی کوئی سہیل ضرور نکالے گا ، ہم معاہدے کی خلاف ورزی کرنا پسند نہیں کرتے’’۔ اس طرح ابوجندل کو پھر مشرکین کے حوالے کردیا گیا۔

ابوجندل جن کا اصل نام عبداللہ بن سہیل بن عمرو ہے، ان صحابہؓ میں سے ہیں جنہوں نے اسلام کے راستے میں بڑی تکلفیں اٹھائی ہیں، جس وقت ان کو باپ کے حوالے کیا جارہا تھا، حضرت عمر بن الخطابؓ نے ایک تلوار ان کے اتنے قریب رکھ دی کہ وہ اسے اٹھا کر اپنے باپ پر حملہ کرسکیں ۔ مگر وہ ڈرے ہوئے تھے، ان میں اتنا حوصلہ نہیں تھا کہ تلوار اٹھا کر باپ کو قتل کردیتے۔ بعد کے واقعات میں یہ ہے کہ ان کو مکے لے جاکر قید کردیا گیا۔ کچھ دنوں کے بعد وہ پھر بھاگ نکلے ، اس مرتبہ وہ مدینہ نہیں گئے، بلکہ ابوبصیرؓ کے ساتھ سمندر کے قریب جاکر رہنے لگے۔ وہاں سے یہ دونوں دوسرے مسلمانوں کے ساتھ مل کر قریش کے تجارتی قافلوں کو نشانہ بناتے تھے ، ان حملوں سے تنگ آکر قریش نے خود یہ کہنا شروع کردیا کہ کسی طرح یہ لوگ مدینہ جاکر مسلمانوں کے ساتھ رہنے لگیں۔( مسند احمد بن حنبل : 212/31، رقم الحدیث:18910 ، فتح الباری ،263/5 ، البدایہ والنہایہ:169/4، الاستیعاب:622/2)

مسلمانوں کا تاثر:

صحابہ کرامؓ شرائط صلح سے بے حد دل گرفتہ تھے، عمرہ کئے بغیر واپس جانے کا غم الگ تھا ، ابوجندلؓ کی آمد او ران کی واپسی نے ان کو اندر سے توڑ کر رکھ دیا تھا،مؤرخین لکھتے ہیں کہ اس واقعے کا حضرت عمرؓ پر اس قدر شدید اثر ہوا کہ وہ ضبط نہ کرسکے، انہوں نے رسول اللہ صلی اللہ علیہ وسلم کی خدمت میں حاضر ہوکر اپنے دلی جذبات او رکیفیات کااظہار کچھ اس طرح کیا: یا رسول اللہ صلی اللہ علیہ وسلم ! کیا آپ صلی اللہ علیہ وسلم اللہ کے سچے نبی نہیں ہیں؟ آپ صلی اللہ علیہ وسلم نے فرمایا: کیوں نہیں، میں اللہ کا سچا نبی ہوں۔ عرض کیا: کیا ہم حق اور وہ باطل پر نہیں ہیں؟ فرمایا: کیوں نہیں! تم حق پر ہو۔ عرض کیا: پھر ہم اپنے دین میں نرمی کیوں برتیں ؟ آپ صلی اللہ علیہ وسلم نے فرمایا: میں اللہ کا رسول ہوں ، اس کی نافرمانی نہیں کرتا، وہی میرا معین ومدد گار ہے۔ عرض کیا: آپ صلی اللہ علیہ وسلم ہی نے فرمایا تھا کہ ہم بیت اللہ کی زیارت کریں گے او راس کا طواف کریں گے۔ فرمایا: ہاں میں نے ایسا کہا تھا ،لیکن کیا میں نے یہ بھی کہا تھا کہ اسی سال جائیں گے، عرض کیا: نہیں، فرمایا: تم ضرور وہاں جاؤگے اور طواف بھی کرو گے۔ حضرت عمرؓ کہتے ہیں کہ اس کے بعد میں ابوبکرؓ کے پاس گیا، اوران سے بھی اسی طرح کے سوال وجواب کئے، ابوبکرؓ کے پاس گیا، ابوبکرؓنے مجھ سے کہا کہ بلاشبہ وہ اللہ کے رسول صلی اللہ علیہ وسلم ہیں، وہ اپنے رب کی نافرمانی نہیں کرتے، اللہ ان کا مددگار ہے، تم ان کو مضبوطی کے ساتھ تھامے رکھو۔ حضرت عمرؓ فرماتے ہیں کے اس گستاخی پر میں بہت نادم ہوا، او راس کی معافی تلافی کے لئے میں نے بہت سے نفلی عبادتیں کیں، صدقہ و خیرات کیا او رکئی غلام آزاد کئے۔(صحیح البخاری:193/3 ، رقم الحدیث: 2731، فتح الباری: 265/5، تاریخ الطبری:634/2)

قربانی اور سرمنڈوانے کا حکم:

صلح نامے پر دستخط ہوگئے ، او ریہ بات طے ہوگئی کہ اب واپس مدینے جانا ہے، سب لوگ احرام کی حالت میں تھے، رسول اللہ صلی اللہ علیہ وسلم نے صحابہؓ کو قربانی کرنے اور سرمنڈانے کاحکم دیا ۔ سب لوگ اس قدر آزردہ خاطر اورشکستہ دل تھے کہ حضور صلی اللہ علیہ وسلم کا حکم سن کر بھی بیٹھے رہے ، آپ نے تین بار حکم دیا، کوئی بھی اپنی جگہ سے ٹس سے مس نہ ہوا۔ آپ صلی اللہ علیہ وسلم کے ہمراہ اس سفر میں ام المومنین حضرت ام سلمہؓ بھی تھیں۔ آپ صلی اللہ علیہ وسلم خیمے کے اندر تشریف لے گئے اور ان کو سارا ماجراسنایا، حضرت ام سلمہؓ نہایت سلجھی ہوئی خاتون تھیں او رفہم و ادراک کی دولت سے بھی مالا مال تھیں، صحابہؓ کی کیفیت سن کر آپ صلی اللہ علیہ وسلم کو یہ مشورہ دیا کہ زبان کہنے کے بجائے آپ صلی اللہ علیہ وسلم عملی اقدام کریں، اپنی قربانی کریں او رحلق بھی کرالیں۔ رسول اللہ صلی اللہ علیہ وسلم نے ان کی مشورے پر عمل کرتے ہوئے ایسا ہی کیا۔ جب صحابہؓ نے یہ دیکھا کہ رسول اللہ صلی اللہ علیہ وسلم قربانی کررہے ہیں او رحلق کرارہے ہیں تو وہ لوگ بھی اٹھے، سب نے قربانی کی ، او رایک دوسرے کے بال مونڈے ۔راوی کہتے ہیں کہ غم کی وجہ سے ان کا یہ حال تھا کہ وہ ایک دوسرے کو قتل بھی کرسکتے تھے۔(صحیح البخاری: 193/3 رقم الحدیث: 2731 ،فتح الباری:266/5) روایات میں ہے کہ بعض صحابہ نے حلق کرایا یعنی گنجے ہوگئے ، اور کچھ نے قصر کرایا یعنی کچھ بال کاٹ دیئے او رکچھ رہنے دیئے، اس عمل سے فراغت کے بعد رسول اللہ صلی اللہ علیہ وسلم نے دعا فرمائی، یا اللہ محلقین پر رحم فرما، صحابہ نے عرض کیا: اور مقصر ین پر؟ رسول اللہ صلی اللہ علیہ وسلم نے فرمایا: اے اللہ محلقین پر رحم فرما، صحابہ نے عرض کیا : او رمقصرین پر؟ آپ صلی اللہ علیہ وسلم نے فرمایا: اے اللہ قصر کرانے والوں پر رحم فرما، رسول اللہ صلی اللہ علیہ وسلم نے اس اونٹ کی قربانی بھی دی جو کبھی ابوجہل کی ملکیت تھا، اس کی ناک میں چاندی کا حلقہ پڑا ہوا تھا، اس اونٹ کو قربانی ہوتا ہوا دیکھ کر مشرکین کے سینوں پر سانپ لوٹنے لگے ۔( سیرت ابن ہشام: 240/3)

صلح حدیبیہ اور سورہ فتح:

تقریباً بیس دن قیام کے بعد رسول اللہ صلی اللہ علیہ وسلم کا قافلہ حدیبیہ سے مدینے کی طرف روانہ ہوا، صحابہؓ نے قربانی کا فریضہ انجام دیا، حلق او رقصر کرایا، احرام بھی دکھول دیئے ، مگر دلوں پر زبردست بوجھ تھا، مایوسی تھی، آزردگی تھی، انہی کیفیات او راحساسات کے ساتھ روانگی کا حکم ملا، روانہ بھی ہوگئے، حسرت سے پیچھے مڑ مڑ کر دیکھتے رہے، یہاں آنا خواب و خیال کی بات ہوگئی۔ آتے ہوئے جس قدر خوش تھے جاتے ہوئے اتنے ہی غم زدہ نظر آرہے تھے، ابھی کراع الغمیم تک پہنچے تھے کہ سورہ الفتح نازل ہوئی ، اس کا آغاز اس آیت کریمہ سے ہوتا ہے: انا فتحنا لک فتحاً مبینا۔(الفتح :1)‘‘(اے پیغمبر) یقین جانیے ، ہم نے آپ کو کھلی ہوئی فتح عطا کردی ہے۔’’

بہ ظاہر جو حالات پیش آئے ، او رجن شرائط پر صلح کی گئی، ان کی روشنی میں اس صلح کو فتح مبین یعنی کھلی ہوئی فتح کہا گیا، یہ عجیب سی بات تھی ،لیکن اللہ تعالیٰ نے اس آیت کے ذریعے گویا یہ پیش گوئی کردی کہ یہ مصالحت ایک بڑی او رکھلی ہوئی فتح کا پیش خیمہ ہے، بالآخر اس کے نتیجے میں مکہ فتح ہوگا، او رکفار و مشرکین کو شکست فاش ہوگی۔

سورہ الفتح کے نزول کے بعد رسول اللہ صلی اللہ علیہ وسلم نے تمام صحابہؓ کو جمع کیا ، اوریہ سورہ تلاوت فرمائی ۔ صحابہؓ تعجب سے پوچھنے لگے : یا رسول اللہ صلی اللہ علیہ وسلم ! کیا یہ فتح مبین ہے؟ آپ صلی اللہ علیہ وسلم نے ارشاد فرمایا: اس ذات کی قسم جس کے قبضے میں میری جان ہے یہ فتح ہی ہے۔ اس وضاحت کے بعد مسلمانوں کے دلوں سے مایوسی کے بادل چھٹ گئے اور ان کے چہروں پر خوشی کے آثار نمایاں نظر آنے لگے ۔ (سنن ابی داؤد: 76/3، 2736، مسند احمد بن حنبل :232/21 ، رقم الحدیث :13638)(جاری)

Urdu Section ( 22 Oct 2022, NewAgeIslam.Com)

The Companions heartbroken by the Terms of Hudabiyya Pact were delighted to hear the news of Conquest of Makkah Part-106 شرائط صلح حدیبیہ سے دل گرفتہ صحابہ‘ فتح مبین ’ کی خوش خبری سن کر کھل اٹھے

Loading..

Loading..