Fri Apr 25 2025, 05:37 PM

Urdu Section ( 6 Sept 2022, NewAgeIslam.Com)

When The Prophet Said, "O Son Of Aku!" Be Gentle To Them After You Have Them under Control" Part-99 جب آپؐ نے فرمایا: ’’اے اکوع کے بیٹے! جب وہ تیرے قابو میں آگئے تو اب نرمی کر!‘‘

مولانا ندیم الواجدی

2 ستمبر 2022

حضرت جابر بن عبد اللہؓ روایت کرتے ہیں کہ جب آپ اس سفر سے واپس ہونے لگے تو آپ کی زبان مبارک پر یہ دُعا تھی، ترجمہ: ’’اللہ نے چاہا تو ہم لوٹ کر آنے والے ہیں، اور توبہ کرنے والے ہیں، اپنے رب کی حمد وثنا کرنے والے ہیں، میں سفر کی مشقت سے، اور رنج وغم سے، اور اہل وعیال اور مال میں لوٹ کر آنے کے وقت برے حال سے تیری پناہ چاہتا ہوں‘‘۔ راوی کہتے ہیں کہ اس سے قبل آپ کی زبان مبارک سے اس طرح کی دُعا سنی نہیں گئی تھی۔

(صحیح مسلم: ۷/۵۶، رقم الحدیث: ۲۳۹۲، مصنف عبد الرزاق: ۵/۱۵۹، مصنف ابن ابی شیبہ: ۷/۱۰۰، زاد المعاد: ۳/۵۲، ۵۳، سیرت ابن ہشام: ۳/۲۰۷) ۔ آپ کا یہ سفر چودہ دنوں پرمحیط تھا۔

غزوۂ ذی قَرَدْ:

اس غزوے کا دوسرا نام غزوۂ غَابَہْ بھی ہے، قَرَد ایک چشمے کا نام ہے، جو مدینہ منورہ سے پینتیس کلو میٹر دوری پر تھا، غَابَہ جنگل کا نام ہے، یہ وہ میدان تھا جہاں رسولؐ اللہ کی اونٹنیاں چرا کرتی تھیں، یہ جگہ جبلِ سِلَع کے قریب تھی، یہاں درختوں کی بہتات تھی، مدینے سے اس کا فاصلہ لگ بھگ بارہ میل ہے، ایک رات بنو غَطَفَان کی ایک شاخ فَزَارہ کے سردار عُیَیْنَہ بن حِصْن نے چالیس سواروں کے ساتھ غابہ پر حملہ کیا اور آپؐ کی بیس اونٹنیاں ہنکاکر لے گیا، حضرت ابوذر غفاریؓ کے بیٹے اپنی بیوی کے ساتھ اس چراگاہ کی دیکھ بھال پر مامور تھے، حملہ آوروں نے ان کو قتل کردیا، اور ان کی بیوی کو اٹھا کر لے گئے، ایک دن رسولؐ اللہ نے اپنے غلام حضرت رَبَاحؓ کو اپنی اونٹنیوں کو دیکھنے کے لیے بھیجا، جس وقت رباحؓ وہاں پہنچے فزارہ کے حملہ آور لوٹ مار کر کے واپس جارہے تھے، اتفاق سے صحابی ٔرسول حضرت سلمہ ابن الاکوعؓ نے مدینے سے نکلتے ہوئے انہیں دیکھ لیا، سَلَمَہ ایک تیز رفتار گھوڑے پر سوار جبلِ سِلَع کے قریب سے گزرے تو انہیں اندازہ ہوا کہ کچھ لوگ غابہ پر حملہ کرکے واپس جارہے ہیں، وہ ایک بہترین تیر انداز بھی تھے، پہلے تو انھوں نے جبلِ سِلَع پر چڑھ کر واصباحا، واصباحا پکارا، اس کے بعد رَبَاح سے کہا کہ تم یہ گھوڑا لے جاؤ اور رسولؐ اکرم کو اس واقعے کی خبر دو، ہم دشمن کے تعاقب میں جاتے ہیں، حضرت سلمہ بڑے نڈر اور بہادر انسان تھے، انھوں نے دشمن کا تعاقب کیا اور ان پر تیر برسائے، ان کے ہر تیر نے دشمن کے ایک فرد کو زخمی کردیا، دشمن اس ناگہانی افتاد سے گھبرا گئے، اور اونٹ چھوڑ کر بھاگ گئے، حضرت سلمہؓ نے پہلے اونٹوں کو اپنے قبضے میں لیا اور انہیں مدینے کی طرف ہنکایا اور پھر دشمن کے پیچھے چل دیئے، وہ اس وقت بالکل تنہا تھے، دشمن کی گھبراہٹ کا یہ عالم تھا کہ وہ اپنا بوجھ ہلکا کرنے کیلئے اپنے نیزے اور دوسرے ہتھیار راستے میں پھینکتے رہے اور حضرت سلمہؓ انہیں اٹھا اٹھا کر محفوظ مقامات پر رکھتے رہے، تیس نیزے اور تیس چادریں ان کے ہاتھ آئیں۔

دوسری طرف حضرت رباحؓ نے خدمت اقدس میں حاضر ہوکر حادثے کی اطلاع دی تو مدینے میں یہ خبر آگ کی طرح پھیل گئی کہ بنی غطفان کے لوگ رسولؐ اللہ کی اونٹنیاں لے گئے ہیں اور انھوں نے حضرت ابوذر غفاریؓ کے بیٹے ذَر کو قتل کرکے ان کی بیوی کو قیدی بنا لیا ہے۔ یہ خبر سن کر سب سے پہلے مِقْدَاد بن الاسْوَدْ رسولؐ اللہ کی خدمت میں حاضر ہوئے، وہ گھوڑے پر سوار تھے، آپ نے ان کے نیزے سے جھنڈا بندھوا یا اور حکم دیا کہ وہ فوراً دشمنوں کے تعاقب میں جائیں، سَلَمہ تنہا ان کا پیچھا کررہے ہیں، ان کے بعد عِبَاد بن بِشْر، سعد بن زید، اُسَیْد بن ظُہَیْر، عُکَاشَہ بن مُحْصِنْ، مَحْرَزْ بن نَضَلَہْ، ابو قَتَادہ، ابو عَیَاش اور عبید بن زید گھوڑوں پر سوار ہوکر آگئے، آپ نے ان کو بھی روانہ کردیا، اس کے بعد آپ پانچ سو صحابہ کو ساتھ لے کر روانہ ہوئے، حضرت عبد اللہ بن ام مکتومؓ کو جاں نشیں مقرر فرمایا، اور تین سو صحابہؓ کو مدینے کی حفاظت پر مامور فرمایا، سعد بن عبادہؓ کو ان کا امیر مقرر کیا۔(سیرت ابن ہشام: ۳/۲۰۸، ۲۰۹، زاد المعاد: ۳/۵۴، ۵۵، عیون الاثر: ۲/۷۲،۷۳)

اب تک تو سَلَمَہ بن الاکوعؓ ہی دشمن سے مقابلہ کررہے تھے، اب وہ شہ سوار بھی اس مقابلے میں شامل ہوگئے جن کو رسولؐ اللہ نے بھیجا تھا، سب سے پہلے اخرم آگے بڑھے، راوی کہتے ہیں کہ ہم نے انہیں پکڑ لیا وہ کہنے لگے: اے اخرم! اگر تم خدا اور قیامت پر ایمان رکھتے ہو اور جنت و دوزخ کو حق سمجھتے ہو تو میرے اور شہادت کے درمیان حائل نہ ہو، میں نے ان کے گھوڑے کی لگام چھوڑ دی، وہ آگے بڑھے، عبد الرحمٰن بن فزاری سے ان کا مقابلہ ہوا، اور شہید ہوگئے، اس کے بعد ابوقتادہ آگے آئے اور عبد الرحمٰن بن عیینہ کو قتل کردیا، حضرت سَلَمَہْ نے ان کا دن بھر تعاقب کیا، نہ انہیں کھانے دیا، نہ کسی چشمے پر پانی پینے دیا، مغرب تک ان کا تعاقب کیا اور ان پر تیر برساتے رہے، حتیٰ کہ وہ اپنے دو گھوڑے چھوڑ کر فرار ہوگئے۔

دن بھر کی مقابلہ آرائی اور بھاگ دوڑ کے بعد حضرت سَلَمَہْ ذی قرد پر واپس آئے، دیکھا تو سرکار دوعالمؐ وہاں تشریف فرما ہیں اور حضرت بلالؓ گوشت بھون رہے ہیں۔ میں نے عرض کیا: یا رسول اللہ! وہ سب بھوکے پیاسے ہیں، مجھے سو آدمی دیجئے، میں سب کو قتل کردوں گا، آپؐ نے ارشاد فرمایا: اب جبکہ تم نے غلبہ حاصل کرلیا ہے نرمی اختیار کرو، ویسے بھی دشمن کے لوگ اب غطفان پہنچ گئے ہیں۔ (زاد المعاد: ۳/۵۷، ۵۸)

بخاری کی روایت:

بخاری شریف میں یہ قصہ کچھ مختلف طریقے پر مذکور ہے۔ اس کے راوی خود حضرت سَلَمہ بن الاکوعؓ ہیں، کہتے ہیں کہ میں اذانِ صبح سے قبل (مدینے سے) نکل کر غَابَہْ کی طرف گیا، رسول اللہ صلی اللہ علیہ وسلم کی اونٹنیاں ذی قَرَد میں چَر رہی تھیں، راستے میں مجھے عبد الرحمٰن بن عوف کا غلام ملا، کہنے لگا کہ رسولؐ اللہ کی اونٹنیاں پکڑ لی گئی ہیں، میں نے پوچھا: کس نے پکڑی ہیں؟ اس نے کہا: غطفَان نے، (یہ سن کر) میں نے تین مرتبہ چیخ کر کہا: یَاصَبَاحَا (دشمنوں نے حملہ کردیا ہے)۔ میری یہ آواز مدینے کی پوری آبادی میں گونج گئی، (اس کے بعد) میں آگے کی طرف روانہ ہوگیا، یہاں تک کہ وہ مجھے مل گئے، وہ جانوروں کو پانی پلانے کی تیاری کررہے تھے، میں نے ان پر تیر چلائے، میں تیر چلا رہا تھا اور یہ کہتا جارہا تھا کہ میں سَلمَہْ بن الاکوع ہوں، آج کمینوں کی ہلاکت کا دن ہے۔ نتیجہ یہ نکلا کہ میں نے تمام اونٹنیاں ان سے چھڑا لیں اور تیس چادریں بھی چھین لیں، (اتنے میں) رسولؐ اللہ اور دوسرے حضرات بھی آگئے، میں نے عرض کیا: یارسولؐ اللہ! میں نے ان لٹیروں کو تیر مار کر بھگا دیا اور ان کو پانی بھی پینے نہیں دیا، وہ پیاسے ہیں، آپ اسی وقت ان کے تعاقب میں فوج روانہ کیجئے۔ آپؐ نے ارشاد فرمایا: اے اکوع کے بیٹے! جب وہ تیرے قابو میں آگئے تو اب نرمی کر۔ آپؐ نے مجھے اپنے پیچھے اونٹنی پر بٹھا لیا، ہم مدینے واپس آگئے۔ (صحیح البخاری: ۱۳/۹۴، رقم الحدیث: ۳۸۷۳)

اس روایت میں حضرت رَبَاح کو حضرت عبد الرحمٰن کا غلام کہا گیا ہے اور مسلم شریف میں ان کو رسولؐ اللہ کا غلام کہا گیا ہے، تاہم اس میں کوئی تعارض نہیں کیونکہ عین ممکن ہے کہ غلام تو عبد الرحمٰن بن عوف کے ہوں، اور وہ رسولؐ اللہ کی خدمت میں رہتے ہوں، اسی لئے ان کو رسولؐ اللہ کا غلام کہہ دیا گیا ہو۔ (کشف الباری: ۹/۴۰۵)

اُس غزوے میں دو شخص شہید ہوئے، ایک اخرم یعنی محرز بن نضلہؓ اور دوسرے وقاص بن محرز المدلجیؓ۔ آپؐ نے اس موقع پر بہ طور ہمت افزائی فرمایا، سواروں میں سب سے بہتر ابوقتادہؓ ہیں اور پیادوں میں سب سے بہتر سَلمہ بن الاکوعؓ ہیں۔ (زاد المعاد: ۳/۵۹)

غزوۂ ذی قَرد کی تاریخ میں اختلاف:

اہل سیر ومغازی اس پر متفق ہیں کہ غزوۂ ذی قرد سن چھ ہجری میں صلح حدیبیہ سے پہلے پیش آیا، حافظ ابن سعد نے طبقات میں ۶؍ ربیع الاول کی تاریخ لکھی ہے، بعض حضرات ۶؍ جمادی الاولیٰ کہتے ہیں۔ حافظ محمد ابن اسحاقؒ شعبان سن ۶؍ ہجری کہتے ہیں۔ ان تمام اقوال سے پتہ چلتا ہے کہ غزوۂ ذی قَرَدْ حدیبیہ سے پہلے کا ہے، کیوں کہ حدیبیہ کا واقعہ ذی قعدہ سن ۶؍ میں پیش آیا ہے، اور جب غزوۂ ذی قَرد کا وقوع حدیبیہ سے پہلے ہے تو ظاہر ہے خیبر سے بھی پہلے ہوگا، کیوں کہ غزوۂ خیبر حدیبیہ کے بعد سن ۷؍ ہجری میں پیش آیا۔ امام بخاریؒ نے غزوۂ ذی قرد کی روایت سے پہلے جو باب باندھا ہے اس میں فرماتے ہیں کہ یہ وہ غزوہ ہے جس میں لوگ رسولؐ اللہ کی دو دھ والی اونٹنیاں بھگا کر لے گئے تھے، خیبر سے تین دن قبل یہ واقعہ رونما ہوا۔(صحیح البخاری: ۱۳/۹۳)

امام بخاریؒ کے ترجمۃ الباب سے پتہ چلتا ہے کہ یہ واقعہ حدیبیہ کے بعد ہوا۔ حافظ ابن قیمؒ اور علامہ بیہقیؒ بھی یہی کہتے ہیں۔ امام مسلم نے اپنی صحیح میں حضرت سَلمہ بن الاکوعؓ کی جو مفصل روایت ذکر کی ہے اس سے بھی اس بات کی تائید ہوتی ہے کہ یہ غزوۂ خیبر سے تین دن پہلے ہوا۔(صحیح مسلم: ۹/۳۰۳، رقم الحدیث: ۳۳۷۱)

علامہ قرطبیؒ نے ان متعارض اقوال میں تطبیق دیتے ہوئے فرمایا کہ حضرت سلمہؓ کی مفصل روایت میں جس خیبر کا ذکر ہے ممکن ہے وہ مشہور غزوۂ خیبر نہ ہو، کیوں کہ رسولؐ اللہ نے خیبر کی طرف کئی بار لشکر روانہ فرمائے ہیں، لیکن ان کی اس بات میں اس لئے وزن نہیں کہ حضرت سلمہؓ نے مَرْحَبْ یہودی کا بھی ذکر کیا ہے، جس سے حضرت علیؓ کا مقابلہ ہوا تھا، اور یہ مقابلہ مشہور غزوۂ خیبر ہی میں ہوا تھا، لہٰذا اس کو کسی دوسرے غزوۂ خیبر پر بلا دلیل محمول کرنا درست نہیں ہے۔

حافظ ابن حجرؒ نے دونوں قسم کی روایات میں تطبیق دینے کیلئے غزوۂ خیبر کو متعدد ماننے کے بجائے غزوۂ ذی قرد کو متعدد مانا ہے، وہ فرماتے ہیں کہ عبد الرحمٰن بن حفص فزاری نے ذی قرد کے مقام پر کئی مرتبہ حملہ کیا ہے، اس لئے جس غزوۂ ذی قرد کا تذکرہ اس وقت ہورہا ہے وہ حدیبیہ سے پہلے پیش آیا ہے، اور امام بخاریؒ جس غزوۂ ذی قرد کو خیبر سے تین دن پہلے کہتے ہیں وہ حدیبیہ کے بعد پیش آیا ہے۔

(طبقات ابن سعد: ۱/۸۰، ۸۱، زاد المعاد: ۳/۵۶، دلائل الامام للبیہقی: ۴/۱۷۸، فتح الباری: ۷/۴۶۰ ، ۴۶۱، بہ حوالہ کشف الباری: ۸/۴۰۳، ۴۰۴)۔ (جاری)