Tue Apr 29 2025, 04:44 AM

Urdu Section ( 8 Nov 2022, NewAgeIslam.Com)

The Prophet Took Control of Makkah in the Year 8 A.H. As Though It Were Not a Difficult Task Part-108 آٹھ ہجری میں آپ صلی اللہ علیہ وسلم نے مکہ اس طرح فتح کرلیا جیسے وہ کوئی مشکل کام تھا ہی نہیں

مولانا ندیم الواجدی

4 نومبر،2022

(گزشتہ سے پیوستہ)

صلح حدیبیہ کے اثرات

آپ صلی اللہ علیہ وسلم نے صلح کیلئے قریش کو ترجیج دی، اوّل تو اس لئے کہ ان سے رشتے داریاں تھیں، وہ ہم وطن بھی تھے ان کا خبث باطن بھی شاید یہو د سے کچھ کم تھا۔ یہود کا غدر بھی پہلے واقع ہوچکا تھا اور خیال یہ تھا کہ اس صلح کے فوراً بعد بشرطیکہ اس میں حرمات اللہ کی تعظیم میں خلل نہ آئے یہود پر چڑھائی کرکے ان کے شر سے محفوظ ہونے کا انتظام کرلیا جائے، پھر قریش رہ جائیں گے وہ جب تک صلح کی پابندی کرتے ہیں ٹھیک ہے صلح رہے گی اور جب وہ صلح کی خلاف ورزی کریں گے تو ان کا انتظام پھر مشکل نہ رہے گا۔چنانچہ اس مصلحت کے پیش نظر آپ صلی اللہ علیہ وسلم نے دب کر صلح کی اور ابھی اس صلح نامے کی سیاہی خشک نہہو پائی تھی کہ آپ صلی اللہ علیہ وسلم نے مکہ سے واپس آکر محرم میں صلح حدیبیہ میں شریک ہونے والے صحابہؓ ہی کو لے کر خیبر پر چڑھائی کردی اور یہود کا ایسا انتظام کردیا کہ وہ پھر سر نہ اٹھا سکیں۔ ذی قعدہ کے آخر میں صلح حدیبیہ ہوئی ہے اور ایک ماہ بیچ میں ہے کہ محرم میں یہود پر فتح حاصل کرلی گئی۔ اب قریش رہ گئے۔ کچھ عرصے تک انہوں نے صلح کی پاسداری کی، دوسال نہیں ہوئے تھے کہ قریش نے صلح کی خلاف ورزی کی اور رمضان آٹھ ہجری میں مکہ پر لشکر کشی کر کے آپ صلی اللہ علیہ وسلم نے مکہ اس طرح فتح کرلیا جیسے کہ وہ کوئی مشکل کام تھا ہی نہیں، اور اس طرح پورے عرب کو بشمول یمن دار الاسلام بنالیا گیا۔ اسی لئے فتح مبین کامصداق بجائے فتح مکہ کے صلح حدیبیہ کو قرار دیا گیا چونکہ یہی صلح درحقیقت فتح مکہ کا پیش خیمہ بنی اور دیگر مصالح پر بھی یہ مشتمل تھی۔(کشف الباری: 367,366/8)

ابوبصیر کاقصہ

رسول اللہ صلی اللہ علیہ وسلم حدیبیہ سے مدینے تشریف لاچکے تھے، ایک روز مکہ مکرمہ سے فرار ہوکر ایک شخص حاضر خدمت ہوا، اس کا نام ابوبصیر عُتبہ بن اسید بن جاریہ تھا، مسلمان ہوچکے تھے، لیکن مکے سے نکلنے میں کامیاب نہ ہوپائے تھے، اپنااسلام بھی چھپا کر نہ رکھ سکے، مشرکین مکہ ان پر مسلسل ظلم وستم ڈھاتے رہے، ایک دن موقع دیکھ کر فرار ہوگئے، اور سیدھے مدینہ منورہ پہنچ کر رسول اللہ صلی اللہ علیہ وسلم کی خدمت میں حاضر ہوئے۔ قریش نے ان کی تلاش میں آدمی دوڑائے، دو قاصد مدینہ منورہ بھی پہنچے اور آپ صلی اللہ علیہ وسلم سے ابوبصیر کی واپسی کامطالبہ کرنے لگے، ان دونوں نے معاہدہ کی اس شق کا حوالہ بھی دیا کہ اگر ہمارا کوئی آدمی بھاگ کر آپ صلی اللہ علیہ وسلم کے پاس آتا ہے تو آپ اسے واپس کرنے کے پابندہیں۔ رسول اللہ صلی اللہ علیہ وسلم معاہدہ کے خلاف کوئی عمل نہیں کرناچاہتے تھے، اس لئے آپ صلی اللہ علیہ وسلم نے ابوبصیرؓ کوان دونوں آدمیوں کے حوالے فرما دیا۔ابوبصیرؓ نے عرض کیا: یا رسول اللہ صلی اللہ علیہ وسلم اللہ! آپ مجھے مشرکین کے حوالے کررہے ہیں، حالانکہ وہ چاہتے ہیں کہ میں اپنا دین چھوڑدوں، اپنی بات منوانے کے لئے وہ مجھے طرح طرح کی تکلیفیں بھی پہنچاتے ہیں۔ رسول اللہ صلی اللہ علیہ وسلم نے انہیں تسلی دیتے ہوئے فرمایا: ابوبصیر،صبر کرو، ہمت سے کام لو، انشاء اللہ عن قریب اللہ تمہارے لئے نجات کا کوئی راستہ ضرور نکالے گا۔

ابوبصیرؓ ان دو آدمیوں کے ساتھ مکہ روانہ ہوگئے، راستے میں کسی جگہ تینوں کھانا کھانے بیٹھے، ابوبصیرؓ نے ان میں ایک شخص سے کہا کہ تمہاری تلوار بہت اچھی ہے، اس شخص نے خوش ہوکر تلوار میان سے نکال کر لہرائی، ابوبصیرؓ نے کہا: ذرا مجھے دکھانا تو، اس سے تلوار ابوبصیرؓ کے ہاتھ میں تھمادی، ابوبصیرؓ نے تلوار ہاتھ میں لیتے ہی اس زور سے گھمائی کہ وہ زمین پر ڈھیر ہوگیا،دوسرا شخص ڈر کر بھا گ گیا، ابوبصیرؓ دوبارہ رسول اللہ صلی اللہ علیہ وسلم کی خدمت میں حاضر ہوئے اور عرض کیا: یا رسول اللہ! آپ صلی اللہ علیہ وسلم اپنی ذمہ داری پوری کرچکے ہیں، آپ صلی اللہ علیہ وسلم نے مجھے ان کے حوالے کردیاتھا، اللہ نے مجھے بچالیا، انہوں نے یہ بھی بتلادیا کہ وہ ایک دشمن کاکام تمام کرچکے ہیں۔ آپ صلی اللہ علیہ وسلم نے فرمایا: ابوبصیر کے لئے بڑی خرابی کی بات ہے، اگر اس کے ساتھ کچھ اور لوگ ہوتے تو یہ جنگ کی آگ بھڑ کادیتا۔

ابوبصیرؓ سمجھ گئے کہ اگر وہ یہاں رہے تو انہیں پھر مشرکین کے حوالے کردیا جائے گا، اس لئے وہ مدینے سے نکل کر ساحل سمندر کے کنارے واقع عیص تک جا پہنچے اور وہیں اپناٹھکانہ بنا لیا۔ یہ جگہ شام سے مکہ آنے والے راستے پر واقع ہے۔ ادھر سے ہوکر قریش کے تجارتی کارواں مکہ آتے جاتے رہتے تھے۔ جلد ہی ابوجندلؓ بھی مکہ سے بھاگ کر ابوبصیر کے پاس آگئے، کچھ او رلوگ بھی آگئے،یہاں تک کہ آنے والوں کی تعداد ستر سے تجاوز کرگئی۔ علامہ سہیلیؒ نے تو الروض الانف میں تین سو کی تعدا د لکھی ہے، یہ وہ مسلمان تھے جو مکہ کے مشرکین کا ظلم محض اس لئے سہہ رہے تھے کہ انہوں نے اسلام قبول کرلیا تھا۔ یہ بھاگ تو سکتے تھے مگر بھاگ کر کہاں جاتے، مدینہ کے دروازے فی الحال بند تھے، کیونکہ مشرکین نے مسلمانوں سے معاہدہ کرلیا تھا اور اس معاہدے کی رو سے مکہ مکرمہ سے بھاگاہوا کوئی شخص وہا ں نہیں رہ سکتا تھا۔ ابوبصیر نے ساحل سمندر کے قریب ٹھکانہ بنایا تو تمام ڈر ے سہمے مجبور او رلاچار مسلمان ایک ایک دو دوکرکے ان کے پاس پہنچ گئے۔

ابوبصیرؓ اور ان کے ساتھی قریش کے تجارتی قافلوں کو نشانہ بناتے، ان کو مارتے اور ان کاسامان لوٹ لیتے۔ یہی ان کی گزر بسر کاذریعہ بھی تھا اور یہی ان کا انتقام بھی۔ ابوبصیرؓ کے مسلسل حملوں نے مشرکین کو اتنا عاجز کیا کہ وہ خود رسول اللہ صلی اللہ علیہ وسلم سے یہ درخواست کرنے پر مجبور ہوگئے کہ خدا را ان مسلمانوں کو آپ مدینہ بلالیجئے۔ رسول اللہ صلی اللہ علیہ وسلم نے ابوبصیرؓ کو خط لکھا کہ وہ اپنے ساتھیوں سمیت میرے پاس آجائیں۔ جس وقت آپ کا یہ خط ابوبصیرؓ تک پہنچا وہ بستر مرگ پر تھے او ربس چند لمحوں کے مہمان تھے، انہوں نے مکتوب گرامی کو اپنے سینے پر رکھا، آنکھوں سے لگایا، اور اسی حال میں اپنے مولیٰ سے جاملے، ابوجندلؓ وغیرہ نے ان کو اسی جگہ دفنا دیا،قریب میں ایک مسجد بنادی اور دوسرے رفقاء کو لے کر مدینہ روانہ ہوگئے۔ (صحیح البخاری: 193/3، رقم الحدیث: 2731، السنن الکبری للبیہقی: 227/9، تاریخ الطبری: 125/2، الروض الانف للسہیلی: 57/4)

ابوبصیر کی چھاپہ مار کاروائیوں کے اثرات پر ڈاکٹر اکرم ضیاء العمری نے بہترین تبصرہ کیا ہے۔ وہ لکھتے ہیں: ”حضرت ابوجندلؓ اور حضرت ابوبصیرؓ نے ایمان کی خاطر بے انتہا تکلیفیں سہیں، لیکن انتہائی استقامت، خلوص نیت اور اولوالعزمی کا مظاہرہ کرتے ہوئے اپنی جدوجہد اس وقت تک جاری رکھی جب تک مشرکین کاسر نیچا نہ کردیا۔ وہ مسلمانوں سے اس سخت شرط کو ہٹانے کاذریعہ بن گئے جو مشرکین نے صلح حدیبیہ میں ان پر عائد کی تھی۔ یہ واقعہ ایمان سے وابستگی او راس کے لئے جدوجہد کی ایک روشن مثال ہے۔ اس واقعے سے یہ اصول بھی اخذ ہوتا ہے کہ کبھی فرد واحد وہ کام کرجاتا ہے جو پورا معاشرہ نہیں کرسکتا۔

ابوبصیرؓاو ران کے رفقاء نے مشرکین کو ایسے وقت میں زک پہنچائی جب اسلامی مملکت ایسا کرنے سے قاصر تھی، کیونکہ مسلمان مشرکین سے صلح او رامن کی شرائط طے کرچکے تھے، حضرت ابوبصیرؓ اور ان کے رفقاء چاہے بہ ظاہر ہی سہی مگر ریاست مدینہ کی عمل داری سے باہر تھے، تاہم انہوں نے اور ان کے ساتھ مکے کے مظلوم مسلمان ساتھیوں نے یہ تمام کاروائیاں محض ایسے اجتہاد سے نہیں کی تھیں جس میں حضور صلی اللہ علیہ وسلم کی رضا شامل نہ ہو،اگر رسول اللہ صلی اللہ علیہ وسلم چاہتے تو شروع ہی میں ابوبصیر کو قریش قافلوں پر حملوں سے منع کردیتے، یا مکے واپس جانے کا حکم دے دیتے، لیکن آپ صلی اللہ علیہ وسلم نے ایسا نہیں کیا جو آپ کی رضا مندی کی بہت واضح علامت تھی۔

حضرت ابوبصیرؓ اور ان کے رفقاء نے جو کیا وہ یقینا عقل مندی تھی۔ انہوں نے مکہ میں رہ کر مظالم برداشت کرتے رہنا بھی گوارا نہیں کیا او رنہ ہی یہ گوارا کیا کہ انہیں ان کے دین سے ہٹانے کی کوششیں کی جاتی رہیں۔ انہوں نے ایک ایسی تدبیر اختیار کی جس سے نہ صرف انہیں اہل مکہ کے ظلم وستم سے نجات مل گئی، بلکہ ان کا روائیوں سے مملکت مدینہ کو بھی مدد ملی، کیونکہ ان کا روائیوں سے قریش کی معیشت کو نقصان پہنچا، ان کا روائیوں کا ایک نفع یہ بھی سامنے آیا کہ صلح کے دور میں بھی قریش کو اپنے تحفظ کا خدشہ لگا رہا۔ یہ بھی کہا جاسکتاہے کہ رسول اللہ صلی اللہ علیہ وسلم نے ابوبصیرؓ کے طرز عمل کی بالواسطہ حوصلہ افزائی کی، کیونکہ آپ نے فرمایا تھا اگر ابوبصیرؓ کے ساتھ کچھ او رلوگ بھی ہوتے تو یہ (عمل) جنگ کی آگ بھڑکا دیتا۔(السیرۃ النبویہ الصحیحہ: 452,451/2، بہ حوالہ تاریخ امت مسلمہ: 315,314/1)

سہیل بن عمرو کو مکے میں یہ معلوم ہوگیا تھا کہ ابوبصیرؓ نے ان کے ایک آدمی کو قتل کردیا ہے، اس نے اعلان کیا کہ وہ محمد (صلی اللہ علیہ وسلم) سے اپنے مقتول کی دیت لے گا۔ ابوسفیان نے کہا کہ تم دیت نہیں لے سکتے، کیونکہ اس قتل میں محمد کی رضا مندی شامل نہیں تھی او رنہ انہوں نے اس کا حکم دیا تھا۔ محمد تو ابوبصیرؓ کو تمہارے آدمیوں کے سپرد کرچکے تھے، اس نے راستے میں یہ حرکت کی ہے، تمہارا کوئی حق نہیں بنتا کہ تم محمد سے دیت کامطالبہ کرو۔(سیرت ابن ہشام: 242/3) (جاری)

Urdu Section ( 8 Nov 2022, NewAgeIslam.Com)

The Prophet Took Control of Makkah in the Year 8 A.H. As Though It Were Not a Difficult Task Part-108 آٹھ ہجری میں آپ صلی اللہ علیہ وسلم نے مکہ اس طرح فتح کرلیا جیسے وہ کوئی مشکل کام تھا ہی نہیں

Loading..

Loading..