Tue Apr 29 2025, 04:15 AM

Urdu Section ( 11 Jul 2022, NewAgeIslam.Com)

In Opposition To the Holy Prophet, the Jewish Delegation Sided With the Polytheists Part-91 نبی کریم ؐ کی مخالفت میں یہودی وفد نے مشرکین کا ساتھ دیا اور مستحق ِلعنت ٹھہرا

مولانا ندیم الواجدی

8 جولائی 2022

غزوۂ خندق

غزوۂ احد کے بعد جو سب سے بڑا معرکہ مسلمانوں اور مشرکین کے درمیان ہوا وہ غزوۂ خندق کہلاتا ہے۔ غزوۂ خندق کہلانے کی وجہ یہ ہے کہ مسلمانوں نے شہر مدینہ سے کفار کو دور رکھنے کے لئے جبل سلع کے دامن میں ایک وسیع وعریض خندق تیار کی تھی، پیچھے سلع پہاڑ تھا، اس کے دامن میں مسلمان تھے، سامنے خندق تھی، اس کے بعد مشرکین اپنے لاؤلشکر کے ساتھ ٹھہرے ہوئے تھے، اس غزوے کو غزوۂ احزاب بھی کہتے ہیں کیوں کہ اس میں کفار کے بہت سے قبائل اکٹھے ہوگئے، احزاب حزب کی جمع ہے جس کے معنی گروہ اور جماعت کے ہیں۔

تاریخ وقوع میں اختلاف

عام اہل سیر ومغازی اس پر متفق ہیں کہ غزوۂ خندق شوال ۵ھ میں ہوا، واقدی کہتے ہیں کہ یہ غزوہ ۸؍ ذی قعدہ بروز منگل ۵ھ میں ہوا، ابن سعد کہتے ہیں کہ اللہ تعالیٰ نے ۹؍ ذی قعدہ بروز بدھ ۵ھ کو اپنے رسول کی دُعا سن لی اور قبائل قریش کو شکست سے دو چار کیا۔ حافظ ابن اسحاقؒ اور قتادہؒ وغیرہ حضرات کی رائے بھی یہی ہے کہ غزوۂ خندق ۵ھ میں ہوا، حافظ ذہبی اور علامہ ابن قیمؒ بھی اسی قول کو راجح قرار دیتے ہیں۔

(المغازی: ۲/۴۴۰، الطبقات الکبری: ۲/۶۵، زاد المعاد: ۲/۲۸۸)

امام بخاریؒ نے اپنی کتاب المغازی میں موسی بن عقبہؒ کا یہ قول نقل کیا ہے کہ غزوۂ خندق شوال ۴ھ میں ہوا، اس کی تائید میں انھوں نے حضرت عبد اللہ بن عمرؓ کی یہ روایت نقل کی ہے کہ وہ غزوۂ احد کے موقع پر رسول اللہ صلی اللہ علیہ وسلم کی خدمت میں پیش ہوئے۔ آپؐ نے ان کو غزوے میں شرکت کی اجازت نہیں دی، کیوں کہ اس وقت ان کی عمر ۱۴؍ سال تھی، پھر خندق کے موقع پر پیش ہوئے، اس وقت پندرہ سال کا ہونے کی بنا پر ان کو اجازت مل گئی۔ (صحیح البخاری:۵/۱۰۷، رقم الحدیث: ۴۰۹۷)

غزوۂ احد بالاتفاق ۳ھ میں پیش آیا، اس روایت کے مطابق اس وقت حضرت ابن عمرؓ ۱۴؍ سال کے لڑکے تھے، آپؐ نے نابالغ ہونے کی وجہ سے ان کو غزوے میں جانے سے روک دیا، پھر غزوۂ خندق کے موقع پر ان کو اجازت مل گئی، اس وقت وہ ۱۵؍ برس کے لڑکے تھے۔

عام سیرت نگاروں کے نزدیک غزوۂ خندق ۵ھ میں ہوا، اس لئے علماء نے امام بخاریؒ کی اس رائے سے اختلاف کیا ہے اور انہوں نے جو روایت نقل کی ہے اس کا جواب بھی دیا ہے، امام بیہقی فرماتے ہیں کہ یہ ممکن ہے کہ عبد اللہ ابن عمرؓ غزوۂ احد کے وقت پورے ۱۴؍سال کے نہ ہوئے ہوں بلکہ وہ ۱۴؍ویں سال میں داخل ہوئے ہوں اور غزوۂ خندق کے وقت پورے ۱۵؍ سال کے ہوں اس اعتبار سے دونوں غزووں کے درمیان دو سال کا وقفہ ہوسکتا ہے۔ (زاد المعاد: ۳/۲۷۰، دلائل البیہقی: ۳/۳۹۶)

اس سلسلے میں سب سے اہم بات یہ ہے کہ غزوۂ احد کے موقع پر ابوسفیان نے کہا تھا کہ آئندہ سال بدر میں ہم تم سے پھر ملیں گے، آپ صلی اللہ علیہ وسلم نے اس کا وعدہ فرمالیا تھا، آپؐ حسب وعدہ لشکر لے کر نکلے، بدر میں ٹھہرے، ابوسفیان اور اس کے لشکر کا انتظار کیا مگر وہ یہ کہہ کر راستے سے واپس چلا گیا کہ یہ سال جنگ کے لئے موزوں نہیں ہے، کیوں کہ قحط سالی کی وجہ سے لوگ پریشان ہیں، اس کے ایک سال بعد وہ دس ہزار آدمیوں کو لے کر مدینے کے قریب آکر ٹھہرا، اسی کو غزوۂ خندق کہتے ہیں، اس کا واضح مطلب یہ ہے کہ غزوۂ خندق ۵ھ میں ہوا ہے۔

امام بخاریؒ نے موسیٰ بن عقبہؒ کے قول اور اس کی تائید میں حضرت عبد اللہ بن عمرؓ کی روایت سے اپنا جو رجحان ظاہر فرمایا ہے اس کی علماء نے بہت سی توجیہات کی ہیں، جن کے ذکر کا یہاں موقع نہیں۔ (تفصیل کے لئے دیکھئے دلائل امام بیہقی: ۳/۳۹۶، باب التاریخ لغزوۃ الخندق، البدایہ والنہایہ: ۴/۹۴)

غزوۂ خندق کے محرکات

قبیلۂ بنی نضیر جو یہودیوں کا بڑا قبیلہ تھا مدینہ منورہ سے نکال دیا گیا تھا، اس قبیلے کے کچھ لوگ شام اور فلسطین کی طرف چلے گئے تھے، اور کچھ لوگ خیبر جاکر آباد ہوگئے تھے، وہاں جاکر انہیں کچھ استحکام حاصل ہوا تو وہ لوگ اپنی پرانی فطرت پر لوٹ آئے، اسلام دشمنی ان کے رگ وپے میں سرایت کی ہوئی تھی۔ جنگ احد میں مسلمانوں کی شکست نے ان کی آتش انتقام کو اور بھڑکا دیا، مشورے ہوئے، طے پایا کہ مشرکین مکہ سے رابطہ کیا جائے اور ان کو مدینے پر حملہ کرنے پر اکسایا جائے، اس مقصد کے لئے ان لوگوں نے سلام بن أبی الحقیق، حیٔ بن اخطب، کنانہ بن الربیع بن أبی الحقیق، ہوذہ بن قیس الوائلی اور ابو عمار پر مشتمل ایک وفد بھی تشکیل دیا، جس کو یہ ذمہ داری دی گئی کہ وہ مکہ اور اس کے اطراف کے قبائل سے ملاقات کرکے ان کو اکٹھا کرے اور انہیں محمد ﷺ اور آپؐ کے ساتھیوں کے خلاف جنگ کی ترغیب دے۔

یہود کا وفد اپنے مقصد میں نہایت کامیاب رہا، مشرکین نے ان کی بڑی پزیرائی کی، عزت واحترام کے ساتھ انہیں اپنا مہمان بنایا اور وفد کی باتوں سے پورا اتفاق ظاہر کیا۔ مشرکین مکہ نے وفد کے سامنے یہ بات بھی رکھی کہ تم لوگ اہل کتاب ہو، اور علم رکھتے ہو، ہم لوگوں میں اور محمد (صلی اللہ علیہ وسلم) میں بڑا اختلاف ہے، ہم بیت اللہ کی خدمت کرتے ہیں، حج کے لئے آنے والوں کی خدمت میں کھانا، شراب اور دودھ پیش کرتے ہیں، اور اپنے بتوں کی پرستش کرتے ہیں، یہ سلسلہ ہمارے آباؤواجداد سے چلا آرہا ہے۔ محمدﷺ نے نیا مذہب ایجاد کیا ہے، وہ ہمارے معبودوں کو برا کہتے ہیں، اب تم بتلاؤ کہ ہمارا دین اچھا ہے یا محمدؐ کا دین اچھا ہے۔ تم علم رکھنے والے لوگ ہو، تمہیں معلوم ہے کیا چیز اچھی ہے اور کون سی چیز بری ہے، یہودی وفد نے مشرکین کی تعریف کی، اور یہ کہا کہ تمہارا دین اچھا ہے، یہ سن کر مشرکین خوش ہوگئے، ان کا جوش بڑھ گیا، اور مسلمانوں کے خلاف جنگ کرنے میں ان کی خواہش اور بڑھ گئی، انھوں نے بلا تاخیر یہودی وفد کی دعوت قبول کرلی، قرآن کریم نے ان اعیان وزعماء یہود کے اس عمل کی شدید مذمت کی ہے کہ وہ رسول اللہ صلی اللہ علیہ وسلم کی عداوت میں اس حد تک گر گئے کہ اہل کتاب ہونے کے باوجود بت پرستوں کے مذہب کی تعریف میں رطب اللسان ہوگئے۔ قرآن کریم نے ایسے لوگوں کو مستحق لعنت قرار دیا ہے۔ (النساء: ۵۱، ۵۲)

یہودی مصنفین اپنے بڑوں کی اس حرکت پر آج تک ماتم کناں نظر آتے ہیں، یہودی مؤلف ویل فینشون (Welfenshon) نے اپنی کتاب میں لکھا ہے ’’ایک معبود کو ماننے والے ہر شخص کے لئے خواہ وہ مسلمان ہو یا یہودی تکلیف دہ بات وہ مکالمہ ہے جو خیبر کے یہودی علماء اور مکے کے بت پرست زعماء کے درمیان ہوا، اور یہود نے قریش کے مذہب کو آسمانی مذہب پر ترجیح دی۔ (تاریخ الیہود فی بلاد العرب ص:۱۴۲)

یہاں سے اٹھ کر یہودی وفد بنی غطفان پہنچا جو قیس بن غیلان کا ایک قبیلہ تھا، اور انہیں یہ پیشکش کی کہ اس سال خیبر میں کھجوروں کی جس قدر پیداوار ہوگی وہ سب آپ لوگوں کو دے دی جائے گی، بس آپ ہمارے ساتھ چلیں اور اس فیصلہ کن جنگ میں حصہ لے کر سرخرو ہوں۔ یہ قبیلہ لالچی تھا، قبیلے کے سردار عیینہ حصن بن نزاری نے اسی وقت ہامی بھرلی اور لشکر لے کر نکل پڑا، یہود نے ایک فصل کی کھجوروں کے بدلے چھ ہزار جنگ جو مانگے جو بنی غطفان نے منظور کرلئے۔

قریش نے چار ہزار افراد کو ساتھ لیا، بنی غطفان کے لوگ بھی چل پڑے، انہوں نے بنی اسد، بنی سلیم کو بھی تیار کرلیا تھا وہ بھی ساتھ لگ گئے، راستے میں بنی غطفان کے دوسرے حلیف، بنی خزارہ، بنی اشجع اور بنی مرّہ بھی ساتھ ہوگئے، اس طرح یہ دس ہزار افراد کا قافلہ ہوگیا، چار ہزار قریش مکہ کے اور چھ ہزار بنی غطفان اور اس کے اعیان وانصار کے، اس فوج میں تین سو گھوڑے اور ایک ہزار اونٹ تھے، ابوسفیان اس کی قیادت کررہا تھا۔ (الکامل فی التاریخ: ۲/۱۲۲، زاد المعاد)

مدافعت کی تیاری

رسول اللہ صلی اللہ علیہ وسلم کے مخبر یہ اطلاع دے چکے تھے کہ بنی نظیر کے یہودیوں کی شہ پر مکے کے مشرکین اور قرب وجوار کے قبائل بڑی تعداد میں جمع ہوکر مدینے کی طرف کوچ کرچکے ہیں، آپ صلی اللہ علیہ وسلم نے صحابۂ کرامؓ سے مشورہ کیا۔ حضرت سلمان فارسیؓ نے رائے دی کہ حفاظت کے لئے خندق کھودی جائے، اس وقت مدینے کے تین اطراف میں آبادی تھی یا کھجور کے باغات تھے، صرف شمالی جانب کا علاقہ کھلا ہوا تھا، جنوب میں اونچے اور ایک دوسرے سے ملے ہوئے مکانات کا ایک طویل سلسلہ تھا، مشرق میں واقم کے نام سے ایک بڑا محلہ تھا اور مغرب میں وبرہ محلے کی آبادی تھی، تین اطراف میں آبادی کے بعد گھنے باغات تھے جن سے لشکروں کا گزرنا ممکن نہ تھا، یہ تین اطراف بالکل محفوظ تھے، صرف شمال کا حصہ کھلا ہوا تھا۔ ادھر ہی سے دشمن کا حملہ متوقع تھا، رسول اللہ صلی اللہ علیہ وسلم نے سلمان فارسیؓ کا مشورہ قبول فرمایا اور اسی وقت سے خندق کھودنے کا کام شروع ہوگیا۔

تین ہزار صحابہ خندق کے کھدائی کے کام میں لگ گئے، آپ صلی اللہ علیہ وسلم نے خود ہی اس کی حدود متعین فرمائیں، خطوط کھینچے، اور دس دس صحابیوں پر دس دس گزر زمین تقسیم فر مائی، خندق کی گہرائی تین میٹر چوڑائی چار میٹر اور لمبائی تقریباً ڈھائی کلو میٹر طے کی گئی، بعض جگہ اتنی گہرائی میں خندق کھودی گئی کہ پانی نکل آیا، یہ طے پایا کہ جبل سلع کو پشت پر رکھ کر اس کے میدان میں مسلمان فروکش ہوں اور سامنے کے حصے میں خندق کھودی جائے، اس کے بعد والے میدان میں دشمن قیام تو کرسکے گا لیکن اس کے لئے خندق عبور کرکے مسلمانوں تک پہنچنا مشکل ہوگا، حافظ ابن سعدؒ کے مطابق چھ دن میں خندق کی کھدائی مکمل ہوگئی، بعض لوگوں نے پندرہ دن اور بعض نے بیس دن کی مدت بتلائی ہے، لیکن علامہ سمہودیؒ فرماتے ہیں کہ اصل میں خندق تو چھ دن میں تیار ہوگئی البتہ بیس دن محاصرے میں لگے۔

(طبقات ابن سعد: ۲/۶۷)(جاری)

8 جولائی 2022، بشکریہ: انقلاب، نئی دہلی

Part: 2- Umm Hani! ام ہانی! میں نے تم لوگوں کے ساتھ عشاء کی نماز پڑھی جیسا کہ تم نے دیکھا، پھرمیں بیت المقدس پہنچا اور اس میں نماز پڑھی، پھر اب صبح میں تم لوگوں کے ساتھ نماز پڑھی جیسا کہ تم دیکھ رہی ہو

Part: 3 - Allah Brought Bait ul Muqaddas before Me and I Explained its Signs اللہ نے بیت المقدس کو میرے روبرو کردیااور میں نے اس کی نشانیاں بیان کیں

Part: 4- That Was A Journey Of Total Awakening وہ سراسر بیداری کا سفر تھا، جس میں آپؐ کو جسم اور روح کے ساتھ لے جایا گیا تھا

Part: 5- The infinite power of Allah Almighty and the rational proof of Mi'raj رب العالمین کی لامتناہی قدرت اور سفر معراج کی عقلی دلیل

Part: 6- The Reward of 'Meraj' Was Given by Allah Only to the Prophet معراج کا انعام رب العالمین کی طرف سے عطیۂ خاص تھا جو صرف آپؐ کو عطا کیا گیا

Part: 7- Adjective of Worship مجھے صفت ِ عبدیت زیادہ پسند اور عبد کا لقب زیادہ محبوب ہے

Part:-8- Prophet Used To Be More Active Than Ever In Preaching Islam During Hajj رسولؐ اللہ ہر موسمِ حج میں اسلام کی اشاعت اور تبلیغ کیلئے پہلے سے زیادہ متحرک ہوجاتے

Part: 9- You Will Soon See That Allah Will Make You Inheritors Of The Land And Property Of Arabia تم بہت جلد دیکھو گے کہ اللہ تعالیٰ تمہیں کسریٰ اور عرب کی زمین اور اموال کا وارث بنا دیگا

Part: 10- The Prophet That the Jews Used To Frighten Us With یہ وہی نبی ہیں جن کا ذکر کرکے یہودی ہمیں ڈراتے رہتے ہیں

Part: 11- Pledge of Allegiance بیعت ثانیہ کا ذکر جب آپؐ سے بنی عبدالاشہل کے لوگوں نے بیعت کی،ایمان لائے اور آپ ؐسے رفاقت و دفاع کا بھرپور وعدہ کیا