Tue Apr 29 2025, 04:33 AM

Urdu Section ( 15 Aug 2022, NewAgeIslam.Com)

After Hearing the Decision of Hazrat Saad, the Prophet PBUH Said: 'You Have Decided What God Wants' Part - 96 حضرت سعدؓ کا فیصلہ سن کر آپؐ نے فرمایا: تم نے وہی فیصلہ کیا ہے جو خدا چاہتاہے

مولانا ندیم الواجدی

12 اگست 2022

ابولبابہؓ کی ندامت اور توبہ

حضرت ابولبابہؓ نے اشارتاً یہ بات کہہ تو دی، مگر ندامت نے ان کی حالت دگرگوں کر ڈالی۔ خود کہتے ہیں کہ ابھی میں نے اپنی جگہ سے قدم اٹھا کر دوسری جگہ بھی نہ رکھا تھا کہ مجھے اس بات کا احساس ہوگیا کہ میں نے اللہ اور اس کے رسولؐ کے ساتھ خیانت کی ہے، مجھے یہ راز افشاں نہیں کرنا چاہئے تھا کہ ان کے ساتھ کیا ہونے والا ہے۔ وہ اسی وقت قلعے سے باہر نکل آئے، شرمندگی اتنی تھی کہ رسول اللہ صلی اللہ علیہ وسلم کے پاس بھی آنے کا حوصلہ نہ کرسکے، سیدھے مسجد نبوی پہنچے اور یہ کہہ کر خود کو ایک ستون کے ساتھ باندھ لیا کہ میں اس وقت تک اسی طرح بندھا رہوں گا جب تک اللہ تعالیٰ میری توبہ قبول نہیں کرلیں گے۔ دوسرا عہد انہوںنے یہ کیا کہ وہ بنی قریظہ نہیں جائیں گے، کیوںکہ جس شہر میں ان سے اتنی بڑی خیانت کا ارتکاب ہوا ہے اس شہر کو وہ دوبارہ دیکھنا نہیں چاہیں گے۔ یہ ستون جس کے ساتھ انہوںنے خود کو باندھا تھا ام المؤمنین حضرت ام سلمہؓ کے حجرے کے قریب تھا۔

ابولبابہؓ سے غلطی سرزد ہوئی اور اس کی تلافی کے لئے انہوںنے اپنے لئے سزا تجویز کی، اس سے پہلے ہی یہ آیت نازل ہوچکی تھی:’’اے ایمان والو! اللہ اور رسول سے بے وفائی نہ کرنا اور نہ جانتے بوجھتے اپنی امانتوں میںخیانت کے مرتکب ہونا۔ ‘‘ (الانفال:۲۷) اس آیت سے آپؐ کو ابولبابہؓ کی کیفیت کا علم ہوا۔آپؐ نے فرمایا اگر ابولبابہ میرے پاس چلے آتے تو میں ان کے لئے دعائے مغفرت کرتا، لیکن جب وہ ایسا کر گزرے ہیں تو میں ان کو اپنے ہاتھ سے اس وقت تک نہ کھولوں گاجب تک اللہ تعالیٰ ان کی توبہ کے سلسلے میں اپنا حکم نازل نہ فرمادے۔

روایات میں ہے کہ حضرت ابولبابہؓ چھ شب و روز کھجور کے ایک تنے سے بندھے رہے اور توبہ و استغفار کرتے رہے، نماز کے اوقات میں ان کی اہلیہ آتیں اور انہیں کھول دیتیں، نماز کے بعد پھر باندھ دیتیں، ایک دن فجر کی نماز سے پہلے رسول اللہ صلی اللہ علیہ وسلم ام المؤمنین حضرت ام سلمہؓ کے حجرے میں تشریف فرما تھے، یکایک آپؐ مسکرانے لگے، حضرت ام سلمہؓ فرماتی ہیں: میں نے عرض کیا یارسولؐ اللہ آپ سدا ہنستے مسکراتے رہیں، اس وقت ہنسنے کی وجہ کیا ہے؟ فرمایا: ابولبابہؓ کی توبہ قبول ہوگئی۔ میں نے عرض کیا: کیا میں ابولبابہؓ کو یہ بات نہ بتلادوں۔ آپؐ نے فرمایا: بتلادو۔ میں اٹھ کر کمرے کے دروازے پر آئی اور میں نے کہا: اے ابولبابہؓ! خوش ہوجائو، اللہ نے تمہاری توبہ قبول فرمالی ہے۔میری آواز سن کر لوگ ابولبابہؓ کو کھولنے کے لئے دوڑے مگر انہوں نے کہا کہ مجھے رسول اللہ صلی اللہ علیہ وسلم ہی اپنے دست مبارک سے کھولیں گے۔ چنانچہ صبح کی نماز پڑھنے کے لئے جب رسول اللہ صلی اللہ علیہ وسلم ان کے پاس سے گزرے تو آپؐ نے ان کو رہا کردیا۔ (سیرت ابن ہشام ۳؍۱۷۰، السیرۃ الحلبیہ ۳؍۱۴۰، تفسیر الطبری ۲۱؍۹۷)

قرآن کریم کی جو آیت حضرت ابولبابہؓ کی توبہ کے سلسلے میں نازل ہوئی وہ یہ ہے:

’’اور کچھ لوگ وہ ہیں جنہوں نے اپنی کوتاہیوں کا اعتراف کیا ہے، انہوں نے ملے جلے عمل کئے ہیں، کچھ نیک کام اور کچھ برے، امید ہے اللہ ان کی توبہ قبول کرے گا۔‘‘ (سورہ توبہ:۱۰۲) حضرت عبداللہ بن عباسؓ کی روایت کے مطابق یہ آیت ان دس حضرات صحابہؓ کے بارے میں نازل ہوئی جو سستی اور کاہلی کی وجہ سے غزوۂ تبوک میںشریک نہیں ہوئے، ان میں حضرت ابولبابہؓ بھی تھے، ممکن ہے حضرت ابولبابہؓ نے دو مرتبہ خود کوستون سے باندھا ہو، ایک مرتبہ بنوقریظہ کے معاملے میں، اور دوسری مرتبہ غزوۂ تبوک میں شرکت نہ کرنے پردوسرے صحابہؓ کے ساتھ۔ ان کے نام سے ایک ستون اب بھی مسجد نبوی میں موجود ہے۔ اسے ’’اسطوانۃ التوبہ‘‘ بھی کہا جاتا ہے۔ (اسباب النزول، واحدی، ۱۹۳)

بنوقریظہ نے ہار مان لی

مسلمانوں کے طویل محاصرے سے عاجز اور پریشان ہو کر بنو قریظہ نے اپنے قلعے سے اتر کر نیچے آنے کا فیصلہ کرلیا اور وہ بھی اس اعلان کے ساتھ کہ ہمارے متعلق رسول اللہ صلی اللہ علیہ وسلم جو بھی فیصلہ فرمائیں گے وہ ہمیں منظور ہوگا۔ ہجرت سے پہلے بنوقریظہ قبیلۂ اوس کے حلیف تھے، بنونضیر کا تعلق خزرج سے تھا، جیسے ہی یہ لوگ قلعے سے باہر نکلے اوس کے بہت سے لوگ رسول اللہ صلی اللہ علیہ وسلم کی خدمت میں حاضر ہوئے اور عرض کیا: یارسولؐ اللہ! بنو قریظہ ہمارے قبیلے کے حلیف ہیں، ہماری درخواست ہے کہ آپؐ ان کو معاف فرمادیں۔انہوں نے یہ بھی عرض کیا کہ آپؐ نے ہمارے خزرجی بھائیوں کے کہنے پر بنی نظیر کو معاف فرما دیاتھا۔ رسول اللہ صلی اللہ علیہ وسلم نے فرمایا: کیا تمہیں یہ بات پسند نہیں کہ تمہارے ہی قبیلے کا کوئی شخص ان کا فیصلہ کردے۔ انہوںنے عرض کیا: یارسولؐ اللہ ہمیں منظور ہے اور ہم اس کا اختیار اپنے قبیلے کے سردار سعد بن معاذؓ کو دیتے ہیں، وہ جو فیصلہ کریںگے ہمیں منظور ہوگا۔ (السیرۃ الحلبیہ۳؍۴۱)

حضرت سعد بن معاذؓ کا فیصلہ

غزوۂ خندق میں تیر لگنے سے حضرت سعد بن معاذؓ زخمی ہوگئے تھے، اور وہ اس غزوے میں شرکت کرنے کے لئے نہیں آسکے تھے۔ رسول اللہ صلی اللہ علیہ وسلم نے فرمایا: ان کو بلائو، لوگ ان کو بلانے کے لئے گئے، ان کا زخم ابھی مندمل نہیں ہوا تھا۔ رسول اللہ صلی اللہ علیہ وسلم کے حکم پر وہ اسی حالت میں ایک خچر پر بیٹھ کر تشریف لے آئے، آپؐ نے انہیں آتے ہوئے دیکھا تو صحابہؓ سے فرمایا اپنے سردار کی تعظیم کے لئے اٹھو، چنانچہ صحابہؓ اٹھے اور انہیں خچر سے اتار کر حضورؐ کے قریب لائے۔ راستے میں اوس قبیلے کے لوگ اپنے سردار سے درخواست کرنے لگے کہ جس طرح خزرجی بھائیوں نے اپنے حلیفوں کو معافی دلوادی تھی آپ بھی رسولؐ اللہ سے کہہ کر اپنے حلیفوں کو معافی دلوادیں۔ سعد بن معاذؓ نے کسی کی بات کا کوئی جواب نہیں دیا، نہ اثبات میں نہ نفی میں، لوگ درخوست کرتے رہے مگر وہ چپ رہے۔بالآخر رسول اللہ صلی اللہ علیہ وسلم کی خدمت میں حاضر ہوگئے، رسولؐ اللہ نے ان سے فرمایا: اے سعد! بنی قریظہ کے معاملے میں فیصلہ کرو، ان کے ساتھ کیا سلوک کیا جانا چاہئے۔ سعد نے عرض کیا: یارسولؐ اللہ! اللہ اور اس کے رسولؐ ہی فیصلے کے زیادہ حق دار ہیں، آپؐ نے فرمایا: اللہ چاہتا ہے تم فیصلہ کرو۔

حضرت سعد بن معاذؓ نے پہلے اپنی قوم کے لوگوں سے یہ عہد لیا کہ وہ جو فیصلہ کریںگے انہیں منظور ہوگا، سب نے سمع و طاعت کا وعدہ کیا، اس کے بعد انہوں نے احتراماً اس جانب اشارہ کیا جدھر رسول اللہ صلی اللہ علیہ وسلم تشریف فرما تھے، مقصد یہ تھا کہ میری قوم تو میرے فیصلے پر رضامند رہے گی، ادھر جو حضرات ہیں وہ کیا کہتے ہیں؟ آپؐ نے فرمایا: ہاں، ہمیں بھی تمہارا فیصلہ منظور ہوگا۔ اس کے بعد انہوں نے اپنا فیصلہ سناتے ہوئے کہا کہ بنی قریظہ میں جو جوان ہٹے کٹے لڑنے والے ہیں ان کو قتل کردیا جائے، ان کے بچوں اور عورتوں کو کو غلام، باندی بنا لیا جائے اور ان کے اموال مسلمانوں میں تقسیم کردئیے جائیں۔ رسول اللہ صلی اللہ علیہ وسلم نے فرمایا: اے سعد! تم نے وہی فیصلہ کیا ہے جو خدا چاہتاہے۔(صحیح البخاری ۱۲؍۱۶۱۵، رقم الحدیث ۳۵۲۰،سیرت ابن ہشام ۳؍۱۷۱، السیرۃ الحلبیہ ۳؍۴۱)

حقیقت یہ ہے کہ حضرت سعد بن معاذؓ کی نگاہ میںاسلام کا وسیع تر مفاد تھا،انہوںنے اپنے قبیلے کے تمام لوگوں کی اپیلیں اور گزارشات محض اس لئے مسترد کردیں کہ یہ وقت فیصلہ کن اقدامات کا متقاضی تھا، اگر آج بنی قریظہ کو پرانے رشتے کے حوالے سے معافی دے دی جاتی کل وہ اسلام اورمسلمانوں کے لئے آج سے بڑا خطرہ بن سکتے تھے، انہوں نے بغاوت کی اور باغیوں کی سزا ہر مذہب کے اساطیر اور ہر ملک کے قوانین میں صرف موت ہے، بنی قریظہ نے کھلم کھلا بغاوت کی تھی، ان کو یہی سزا ملنی چاہئے تھی جو سعد بن معاذؓ نے تجویز کی اور وہ شاید اسی دن کے لئے زندہ تھے، روایات میں ہے کہ اس فیصلے کے بعد ان کے زخموں سے خون بہہ پڑا اور وہ جاں بحق ہوگئے۔

حضرت عائشہؓ فرماتی ہیں کہ اس فیصلے کے بعد سعد نے یہ دعا مانگی: ’’اے اللہ! تو جانتا ہے کہ مجھے اس سے زیادہ کوئی عمل پسند نہیں کہ میں تیری خاطر ان لوگوں سے جہاد کروں جنہوں نے تیرے رسول کو جھٹلایا اور ان کو وطن سے نکالا، اے اللہ! میرا خیال ہے کہ اب تونے ہمارے اور قریش کے درمیان جنگ ختم کردی ہے، اگر یہ جنگ تھوڑی بہت باقی ہے تو مجھے زندہ رکھ تاکہ میں ان سے جہاد کرسکوں اور اگر جنگ ختم ہوچکی ہے تومیرا یہ زخم جاری کردے تاکہ میں اسی مرض میں مرجائوں۔‘‘ حضرت عائشہ کہتی ہیں کہ اس فیصلے کے بعد ان کے زخم سے خون بہہ پڑا اور اسی میںوہ وفات پاگئے۔ (صحیح البخاری ۱۳؍۲۷، رقم الحدیث ۸۳۱۳، صحیح مسلم ۹؍۲۲۵، رقم ۳۳۱۶)

حضرت سعدؓ کی وفات کے بعد رسول اللہ صلی اللہ علیہ وسلم نے فرمایا:ان کی موت سے عرش الٰہی ہل گیا۔ ایک روایت میں ہے کہ ان کی روح کے لئے آسمان کے تمام دروازے کھول دئیے گئے اور فرشتے ان کے آنے سے خوش ہوئے،ان کے جنازے پر ستر ہزار فرشتے آسمان سے اتر کر شریک ہوئے،ان کی قبر سے مشک کی خوشبو آیا کرتی تھی۔ (صحیح البخاری۱۲؍۱۶۴، رقم ۳۵۱۹، صحیح مسلم۱۲؍۲۴۰، رقم الحدیث ۴۵۱۱، سیر اعلام النبلاء ۱؍۲۹۰، ۲۹۱)

فیصلے کانفاذ

حضرت سعد بن معاذؓ کے فیصلے پر اسی وقت عمل ہوا، بنو قریظہ کے تمام لوگوں کو قیدی بناکر مدینے لایا گیا اور ایک انصاری عورت کے کشادہ مکان میں ان کو رکھا گیا۔نابالغ بچوں اور عورتوں کو قتل نہیں کیا گیا، صرف ایک عورت کو قتل کی سزا دی گئی، اس کا نام نبانہ بتلایا گیا ہے، اس کو اس لئے قتل کیا گیا کہ اس نے چھت سے چکی کا پاٹ گرا کر حضرت خلاّد بن سُویدؓ کو شہید کیا تھا، اس پر قصاص کی حد جاری کی گئی۔

حی ابن اخطب یہودی

ان قیدیوں میں قبیلۂ بنی النضیر کا سردار حی بن اخطب بھی تھا، اسی نے بنو قریظہ کو عہد شکنی پر آمادہ کیا تھا، بنی قریظہ نے اس شرط کے ساتھ رسول اللہ صلی اللہ علیہ وسلم کے ساتھ اپنا معاہدہ ختم کیا تھا کہ جنگ میںشکست ہونے پر وہ شخص ہمارے ساتھ ہمارے قلعے میں رہے گا، غزوۂ خندق میں شکست کے بعد حی ابن اخطب اپنے وعدے کے مطابق بنی قریظہ کے پاس ان کے قلعے میں آگیا، جب بنو قریظہ کو گرفتار کرکے لایا گیا تویہ شخص بھی قیدیوں میں شامل ہوا اور اس کے قتل کا بھی فیصلہ ہوا۔ جس وقت اس کو قتل گاہ کی طرف لے جایا جارہا تھا وہ کچھ دیرکے لئے رسول اللہ صلی اللہ علیہ وسلم کے پاس رکا اور آپ کی طرف دیکھ کر کہنے لگا کہ میں آپ کی عداوت میں خود کو ملامت نہیں کروں گا، بات صرف اتنی ہے کہ جس کو اللہ ذلیل کرنا چاہے وہ ذلیل ہو کر رہتا ہے، پھر وہ لوگوں کی طرف متوجہ ہوا اور کہنے لگا: اے لوگو! جو کچھ ہوا وہ اللہ کے حکم سے، اس کی لکھی ہوئی تقدیر کے مطابق ہوا، یہ ایک سزا تھی جو اللہ نے بنی اسرائیل کی قسمت میں لکھ دی تھی۔ پھر وہ بیٹھ گیا اور کچھ دیر اپنے انجام کو پہنچا دیا گیا۔(تاریخ ابن کثیر ۴؍۱۲۴، ۱۲۵، عیون الاثر۲؍۱۰۹، زاد المعاد ۳؍۱۳۵)(جاری)

12 اگست 2022 ، بشکریہ: انقلاب، نئی دہلی

Part: 2- Umm Hani! ام ہانی! میں نے تم لوگوں کے ساتھ عشاء کی نماز پڑھی جیسا کہ تم نے دیکھا، پھرمیں بیت المقدس پہنچا اور اس میں نماز پڑھی، پھر اب صبح میں تم لوگوں کے ساتھ نماز پڑھی جیسا کہ تم دیکھ رہی ہو

Part: 3 - Allah Brought Bait ul Muqaddas before Me and I Explained its Signs اللہ نے بیت المقدس کو میرے روبرو کردیااور میں نے اس کی نشانیاں بیان کیں

Part: 4- That Was A Journey Of Total Awakening وہ سراسر بیداری کا سفر تھا، جس میں آپؐ کو جسم اور روح کے ساتھ لے جایا گیا تھا

Part: 5- The infinite power of Allah Almighty and the rational proof of Mi'raj رب العالمین کی لامتناہی قدرت اور سفر معراج کی عقلی دلیل

Part: 6- The Reward of 'Meraj' Was Given by Allah Only to the Prophet معراج کا انعام رب العالمین کی طرف سے عطیۂ خاص تھا جو صرف آپؐ کو عطا کیا گیا

Part: 7- Adjective of Worship مجھے صفت ِ عبدیت زیادہ پسند اور عبد کا لقب زیادہ محبوب ہے

Part:-8- Prophet Used To Be More Active Than Ever In Preaching Islam During Hajj رسولؐ اللہ ہر موسمِ حج میں اسلام کی اشاعت اور تبلیغ کیلئے پہلے سے زیادہ متحرک ہوجاتے

Part: 9- You Will Soon See That Allah Will Make You Inheritors Of The Land And Property Of Arabia تم بہت جلد دیکھو گے کہ اللہ تعالیٰ تمہیں کسریٰ اور عرب کی زمین اور اموال کا وارث بنا دیگا

Part: 10- The Prophet That the Jews Used To Frighten Us With یہ وہی نبی ہیں جن کا ذکر کرکے یہودی ہمیں ڈراتے رہتے ہیں

Part: 11- Pledge of Allegiance بیعت ثانیہ کا ذکر جب آپؐ سے بنی عبدالاشہل کے لوگوں نے بیعت کی،ایمان لائے اور آپ ؐسے رفاقت و دفاع کا بھرپور وعدہ کیا

Part: 12 - Your Blood Is My Blood, Your Honour Is My Honour, and Your Soul Is My Soul تمہارا خون میرا خون ہے، تمہاری عزت میری عزت ہے، تمہاری جان میری جان ہے