Fri Apr 25 2025, 05:45 PM

Urdu Section ( 17 Oct 2022, NewAgeIslam.Com)

Hazrat Ali Refused To Remove the Lettering That Read "Muhammad the Messenger of Allah" Part-105 حضرت علیؓ نے وہ عبارت مٹانے سے انکار کردیا جس میں محمد’رسول اللہ‘ لکھا تھا

مولانا ندیم الواجدی

14اکتوبر،2022

(گزشتہ سے پیوستہ)

عروہ بن مسعود بھی پہنچے

عروہ بن مسعود ثقفی نے کہا: اے محمد! اگر تم اپنی جڑ بنیاد بالکل ہی کاٹ ڈالوگے تو اس سے تمہیں کیا فائدہ پہنچے گا، کیا تم نے کسی عرب کے متعلق سنا ہے کہ اس نے اپنی قوم کو ہلاک کردیا ہو، اگر دوسری بات ہوجائے، یعنی تم مغلوب ہوجاؤ، پھر کیا ہوگا، اور ہونا یہی ہے، کیوں کہ میں تمہارے آس پاس کچھ ایسے لوگوںکو دیکھ رہا ہوں جو تمہیں چھوڑ کر بھاگ جائیں گے۔ حضرت ابوبکرؓ وہاں موجود تھے، انہیں یہ بات سن کر غصہ آگیا۔ انہوں نے سخت لہجے میں عروہ سے کہا کہ کیا تو سمجھتا ہے کہ ہم میدان جنگ سے بھاگ جائیں گے، کیا ہم انؐ کو تنہا چھوڑ دیں گے؟ عروہ نے پوچھا: یہ کون ہیں؟ لوگوں نے بتلایا یہ ابوبکرؓ ہیں۔انہوں نے کہا تم نے مجھ پر ایک احسان کر رکھا ہے اور میں آج تک اس کا بدلہ نہیں چکا پایا، خدا کی قسم اگر یہ احسان نہ ہوتا تو میں انہیں جواب ضرور دیتا۔

راویٔ حدیث حضرت مسور بن مخرمہ کہتے ہیں کہ عروہ جب بھی کوئی بات کرتے، رسول اللہ صلی اللہ علیہ وسلم کی ڈاڑھی کی طرف اپنا ہاتھ ضرور لے جاتے۔ یہ عربوں کا طریقہ تھا کہ جب انہیں کسی کی خوشامد مقصود ہوتی تو وہ اس کی ڈاڑھی کو ہاتھ ضرور لگایا کرتے تھے۔ صحابہؓ کو یہ طریقہ بے حد ناگوار گزر رہا تھا، چناں چہ وہ جب بھی اپنا ہاتھ آپ صلی اللہ علیہ وسلم کی ڈاڑھی کی طرف لے جاتے، صحابہ کو غصہ آجاتا۔ مغیرہ بن شعبہؓ جو آپؐ کے سرہانے کھڑے ہوئے تھے، غصے سے اپنی تلوار کی بٹ اس کے ہاتھ پر مار کر کہتے، اے عروہ! اپنا ہاتھ پیچھے رکھ۔

عروہ بن مسعودؓ مسلسل محو گفتگو تھے، مگر ان کی نگاہیں کہیں اور تھیں، وہ چشم حیرت سے یہ منظر دیکھ رہے تھے کہ صحابہؓ محمد صلی اللہ علیہ وسلم سے کتنی محبت کرتے ہیں، آپؐ کا کس قدر احترام کرتے ہیں اور آپؐ کی حفاظت کے لئے کتنے فکر مند رہتے ہیں، جب آپ وضو کرتے تو وہ آپ کے وضو کے بچے ہوئے پانی پر لڑپڑتے، جب آپ بولتے تو وہ لوگ اپنی آوازیں پست کرلیتے، کوئی بھی شخص ادب واحترام کی وجہ سے ان کی طرف نظر بھر کر دیکھنے کی جرأت نہ کرتا تھا۔

عروہ کچھ دیر بعد واپس چلے گئے۔ انہوں نے اپنی قوم سے کہا: لوگو! میں بہت سے بادشاہوں کے درباروں میں جاچکا ہوں، میں نے قیصر وکسریٰ اور نجاشی کو بھی دیکھا ہے، خدا کی قسم! میں نے محمدؐ کے علاوہ کوئی ایسا بادشاہ نہیں دیکھا جس کی اس کے اصحاب اس قدر تعظیم کرتے ہوں، جب محمدؐ کسی کام کے لئے کہتے ہیں تو وہ لوگ اسے کرنے میں سبقت کرتے ہیں، جب وضو کرتے ہیں تو بچے ہوئے پانی کے لئے وہ لوگ ایک دوسرے سے لڑ پڑتے ہیں، جب وہ گفتگو کرتے ہیں تو ان کی مجلس میں خاموشی چھا جاتی ہے، ان کے دلوں میں محمدؐ کی اس قدر عظمت اور عزت ہے کہ وہ ان کی طرف نگاہ اٹھا کر دیکھنے کی بھی ہمت نہیں کرتے، اے گروہِ قریش! انہوں نے تمہارے سامنے بہترین تجویز رکھی ہے، تمہیں ان کی تجویز قبول کرلینی چاہئے۔ (صحیح البخاری: ۳/۱۹۳، ۲۷۳۱، فتح الباری: ۵/۳۲۰، سیرۃ ابن ہشام: ۳/۲۳۴)

سہیل بن عمرو کی سفارت:

سب سے آخر میں سہیل بن عمرو آئے۔ یہ اس وقت تک مسلمان نہیں ہوئے تھے، بعد میں جلیل القدر صحابی بنے، دین حق کے لئے ان کی بڑی خدمات ہیں۔ ایام جاہلیت میں ان کی خطابت کا بڑا شہرہ تھا۔ تمام لوگوں کی ناکام سفارت کے بعد قریش نے اپنے بہترین خطیب اور صاحب عقل ودانش سہیل بن عمرو کو بھیجنے کا فیصلہ کیا۔ ان کو آتا ہوا دیکھ کر رسول اللہ صلی اللہ علیہ وسلم نے فرمایا: اب قریش نے اس شخص کو بھیجا ہے، ایسا لگتا ہے کہ وہ صلح کرنا چاہتے ہیں۔ آپؐ نے صحابۂ کرامؓ سے یہ بھی فرمایا کہ تمہارا معاملہ اب کچھ آسان ہوگیا ہے۔

سہیل بن عمرو اس پیغام کے ساتھ آئے کہ ہم مصالحت کے لئے تیار ہیں، لیکن ہماری اولین شرط یہ ہے کہ محمد اس سال تو واپس چلے جائیں، البتہ آئندہ سال وہ عمرے کے لئے آجائیں، اس مرحلے میں اگر ہم نے آپ کو طواف کرنے کی اجازت دے دی تو عرب کے لوگ یہ کہیں گے کہ قریش محمد سے ڈر گئے ہیں، آپ صلی اللہ علیہ وسلم نے اس پر اپنی رضامندی ظاہر فرمادی۔ اب انہوں نے مزید شرائط پیش کیں، ان پر تبادلۂ خیال ہوا، بالآخر چند شرطوں پر اتفاق ہوگیا، اور یہ بھی طے ہوگیا کہ تمام شرائط لکھ لی جائیں اور ان پر جانبین کے دستخط ہوجائیں۔

روایات میں ہے کہ سہیل بن عمرو رسول اللہ صلی اللہ علیہ وسلم کی مجلس میں مؤدب ہوکر بیٹھے، انہوں نے اپنی گفتگو کے دوران آپؐ کا احترام پورے طور پر ملحوظ رکھا، اکثر صحابہؓ پہلی شرط سن کر ہی ناراض ہوگئے، وہ نہیں چاہتے تھے کہ عمرہ کئے بغیر ہی مدینے واپسی ہو، بعض صحابہؓ نے سہیل سے سخت لہجے میں بھی بات کی، گفتگو کے دوران طرفین کی آوازیں بھی بلند ہوئیں، سہیل کسی صحابی کے ساتھ زور سے بولے تو حضرت عبادہ بن بشرؓ نے انہیں ڈانٹا کہ تم رسول اللہ صلی اللہ علیہ وسلم کی موجودگی میں اپنی آواز بلند مت کرو، لیکن رسول اللہ صلی اللہ علیہ وسلم اس مصالحت سے متفق تھے، رسول اللہ صلی اللہ علیہ وسلم کو مصالحت پر آمادہ دیکھ کر صحابہ بھی خاموش ہوگئے۔

صلح نامہ لکھنے کا وقت آیاتو آپؐ نے حضرت علیؓ کو بلایا اور فرمایا اے علیؓ ! لکھو، بسم اللہ الرحمٰن الرحیم، سہیل فوراً بولے، بسم اللہ تو ٹھیک ہے لیکن الرحمٰن الرحیم ہمارے یہاں رائج نہیں ہے، ہمارا جو طریقہ ہے وہ باسمک اللّٰہم لکھنے کا ہے، آپؐ نے حضرت علیؓ سے فرمایا: ایسا ہی لکھ دو، حضرت علیؓ نے باسمک اللٰہم لکھ دیا ۔اگلا فقرہ جو آپؐ نے لکھوایا وہ یہ تھا ہذا ما قاضی علیہ محمد رسول اللّٰہ۔ (ترجمہ) یہ وہ معاملہ ہے جس پر اللہ کے رسول محمدؐ نے صلح کی ہے۔ سہیل نے اس جملے پر یہ اعتراض کیا کہ اگر ہم آپؐ کو اللہ کا رسول مانتے تو جھگڑا کس بات کا تھا، ساری لڑائی ہی اسلئے ہے کہ آپؐ خود کو اللہ کا نبی اور رسول کہتے ہیں، اور ہم یہ بات تسلیم نہیں کرتے، اس لئے آپ صرف اپنا نام محمد بن عبد اللہ بن عبدالمطلب لکھوائیں۔ رسول اللہ ﷺ نے فرمایا: خدا کی قسم! میں اللہ کا رسول ہوں اگرچہ تم یہ بات تسلیم نہیں کرتے اور مجھے جھٹلاتے ہو، پھر آپؐ نے حضرت علیؓ سے فرمایا: اس عبارت کو کاٹ کر میرا نام لکھ دو۔ حضرت علی ؓنے عرض کیا: میں ہرگز یہ عبارت نہیں مٹاؤں گا۔ آپؐ نے فرمایا اچھا وہ جگہ بتلاؤ جہاں لفظ رسول اللہ لکھا ہے، حضرت علیؓ نے انگلی رکھ کر بتلایا وہ جگہ یہ ہے، آپؐ نے خود اپنے دست مبارک سے وہ لفظ مٹا دیا، بعد میں حضرت علیؓ نے محمد بن عبد اللہ لکھ دیا۔

(صحیح مسلم : ۹/۲۵۸، رقم الحدیث: ۳۳۷، سیرت ابن ہشام: ۳/۲۳۷)

شرائط صلح:

(۱) اس سال مسلمان واپس چلے جائیں۔

(۲) اگلے سال آئیں اور صرف تین دن قیام کریں۔

(۳) مسلمانوں کو صرف تلواریں لانے کی اجازت ہوگی اور وہ بھی نیام میں رکھ کر۔

(۴) جو مسلمان مکے میں مقیم ہیں ان میں سے کسی کو ساتھ لے کر نہ جائیں، اور اگر کوئی مسلمان مکے میں رہنا چاہے تو اسے نہ روکیں۔

(۵) اگر اہل مکہ میں سے کوئی مدینے چلا جائے تو اسے واپس کردیا جائے، اور کوئی مدینے سے مکہ آجائے تو اسے واپس نہ مانگا جائے۔

(۶) قبائل عرب کو اختیار ہوگا کہ وہ جس کے ساتھ چاہیں معاہدہ کریں، دونوں فریق اس کا احترام کریں گے۔

(۷) یہ صلح دس برس کے لئے ہوگی۔

اس صلح نامے پر کچھ مسلمانوں نے اور چند مشرکین نے بہ طور گواہ دستخط کئے، مسلمانوں میں سے جن لوگوں نے اس پر دستخط کئے ان کے نام ہیں، ابوبکر صدیق، عمر بن خطاب، عبد الرحمٰن بن عوف، عبد اللہ بن سہیل بن عمرو۔ سعد بن ابی وقاص، محمود بن مسلمہ اور علی بن ابی طالب رضی اللہ عنہم، مشرکین کی طرف سے مکرز بن حفص اور سہیل بن عمرو نے دستخط کئے۔ (سیرت ابن ہشام: ۳/۲۳۸، البدایہ والنہایہ: ۴/۱۶۸)

مشرکین کا حملہ:

ابھی صلح نامے کی کتابت کا عمل جاری تھا کہ قریش کے کچھ نوجوانوں نے جن کی تعداد اسّی بتلائی گئی ہے، تَنْعِیْمکی جانب سے آکر مسلمانوں پر حملہ کردیا، اللہ کے رسولؐ کو اس حملے کی اطلاع دی گئی۔ صحابہؓ نے انہیں گرفتار کرلیا اور رسولؐ اللہ کی خدمت میں لے کر آئے، عمرو بن سہیل اُس وقت شرائط صلح پر بحث کررہے تھے، کچھ شرائط لکھی جاچکی تھیں اور کچھ لکھنی باقی تھیں، وہ اس اچانک حملے سے ورطۂ حیرت میں پڑ گئے، انھوں نے قوم کی برأ ت کرتے ہوئے کہا کہ یہ سر پھرے نوجوان خود ہی اپنی مرضی سے یہاں آئے ہیں، مکے کے کسی ذی شعور انسان کی تحریک پر نہیں آئے، آپ انہیں میرے حوالے کردیں، یہ کسی جنگ کے نتیجے میں قید نہیں ہوئے ہیں۔ رسولؐ اللہ نے ارشاد فرمایا کہ ان لوگوں کو اس وقت تک واپس نہیں کیا جائے گا جب تک ہمارے وہ لوگ جو قریش کی قید میں ہیں آزاد ہوکر یہاں نہ پہنچ جائیں۔ عمرو بن سہیل نے کہا: آپ نے انصاف کی بات کی ہے، اسی وقت شَتِیْم بن عبد مناف تیمی کو قریش کے پاس بھیجا گیا، وہ تمام مسلمان قیدیوں کو جن کی تعداد تقریباً دس تھی رہا کراکے اپنے ساتھ لایا، ان میں حضرت عثمان بن عفانؓ بھی تھے۔ سورہ فتح کی یہ آیت اسی صورت حال کی عکاسی کرتی ہے، فرمایا: ’’اور اللہ وہی ہے جس نے وادیِ مکہ میں تم سے ان کے ہاتھوں کو روک دیا (یعنی وہ تم پر حملہ نہ کر پائے) اور تمہارے ہاتھوں کو ان سے روک دیا اس کے بعد کہ اس نے تمہیں ان پر غالب بنا دیا تھا۔ (صحیح البخاری: ۳/۱۹۳، رقم الحدیث: ۲۷۳۱) (جاری)

14 اکتوبر،2022،بشکریہ: انقلاب، نئی دہلی

--------------

Part: 2- Umm Hani! ام ہانی! میں نے تم لوگوں کے ساتھ عشاء کی نماز پڑھی جیسا کہ تم نے دیکھا، پھرمیں بیت المقدس پہنچا اور اس میں نماز پڑھی، پھر اب صبح میں تم لوگوں کے ساتھ نماز پڑھی جیسا کہ تم دیکھ رہی ہو

Part: 3 - Allah Brought Bait ul Muqaddas before Me and I Explained its Signs اللہ نے بیت المقدس کو میرے روبرو کردیااور میں نے اس کی نشانیاں بیان کیں

Part: 4- That Was A Journey Of Total Awakening وہ سراسر بیداری کا سفر تھا، جس میں آپؐ کو جسم اور روح کے ساتھ لے جایا گیا تھا

Part: 5- The infinite power of Allah Almighty and the rational proof of Mi'raj رب العالمین کی لامتناہی قدرت اور سفر معراج کی عقلی دلیل

Part: 6- The Reward of 'Meraj' Was Given by Allah Only to the Prophet معراج کا انعام رب العالمین کی طرف سے عطیۂ خاص تھا جو صرف آپؐ کو عطا کیا گیا

Part: 7- Adjective of Worship مجھے صفت ِ عبدیت زیادہ پسند اور عبد کا لقب زیادہ محبوب ہے

Part:-8- Prophet Used To Be More Active Than Ever In Preaching Islam During Hajj رسولؐ اللہ ہر موسمِ حج میں اسلام کی اشاعت اور تبلیغ کیلئے پہلے سے زیادہ متحرک ہوجاتے

Part: 9- You Will Soon See That Allah Will Make You Inheritors Of The Land And Property Of Arabia تم بہت جلد دیکھو گے کہ اللہ تعالیٰ تمہیں کسریٰ اور عرب کی زمین اور اموال کا وارث بنا دیگا

Part: 10- The Prophet That the Jews Used To Frighten Us With یہ وہی نبی ہیں جن کا ذکر کرکے یہودی ہمیں ڈراتے رہتے ہیں

Part: 11- Pledge of Allegiance بیعت ثانیہ کا ذکر جب آپؐ سے بنی عبدالاشہل کے لوگوں نے بیعت کی،ایمان لائے اور آپ ؐسے رفاقت و دفاع کا بھرپور وعدہ کیا